१४ घण्टा अघि
२0८१ चैत्र २२ शनिबार
उदयपुर, चैत २३
लिमचुङबुङ गाउँपालिका ४ छाताङमा शनिबार भएको आगलागीबाट एक स्थानीय तिलेन्द्र राईको घरसहित धनमाल र पशु चौपाया जलेर क्षति पुगेको छ ।
स्थानीय साग्रा जङ्गलमा फैलिएको आगोले सो क्षति गरेको वडाध्यक्ष छत्रबहादुर राईले बताए । उनका अनुसार मध्यान्ह १२:०० बजेतिर जङ्गलमा सल्केको डढेलो बस्तीमा पसेर राईको घर गोठ, बाख्रा, खसी, सुङ्गुर सबै जलाएको छ । आगोले राईको ढुङ्गा माटोले बनेको ,फुसको छाना भएको २ तले घर, घरभित्र रहेको अन्नपात, लत्ताकपडा, भाँडाकुडा, कागजात र नगदसमेत जलेको छ ।
आगोले गोठ र गोठभित्र बाँधिएका खसी ३ वटा, बाख्रा १०, बङ्गुरको खोर र खोरभित्र रहेका बङ्गुर:२ सबै जलेर मरेका छन् । त्यसैगरी डढेलोले साग्रा खानेपानी योजनाको पाईप जलेका कारण स्जथानी ७० घरधुरी परिवारलाई खानेपानीको हाहाकार भएको छ ।
साग्रा खोलाकै मुहानबाट सञ्चालित खानेपानीको पाईप मात्र ४० लाख बढीको क्षति भएको अनुमान वडाध्यक्ष राईले गरेका छन् । स्थानीय र प्रहरी मिलेर निभाउने प्रयास भईरहे पनि आगो जियन्त्रणमा आईरहेको छैन ।
ईलाका प्रहरी कार्यालय लिमचुङबुङ बाराहाबाट आएको टोलीले जलेको घर र धनमालको क्षति विवरण सङ्कलन गर्दा राईको ९ लाख बराबरको नोक्सा नभएको छ । तर, खानेपानीको यकिन क्षति विवरण भने अहिले नै भन्न सक्ने अवस्था छैन ।
प्रहरीले डढेलो निभाउन र उद्धार कार्यमा स्थानीयलाई सहयोग गरिरहेको वडाध्यक्ष राईले बताएका छन् ।
