९ घण्टा अघि
२0८१ चैत्र २१ शुक्रबारश्रीपुर, चैत २२
त्रियुगा नगरपालिका ५ श्रीपुरमा शुक्रबारदेखि सुरु 'पाँचौ वडाध्यक्ष कप फुटबल प्रतियोगिता २०८१' मा साउनेले विजयी सुरुवात गरेको छ । उद्घाटन खेलमा त्रियुगा १४ साउनेले आयोजक श्रिपुर फुटबल क्लब (बी) त्रियुगा ५ लाई ३-० गोलले पराजित गर्दै विजयी यात्रा प्रारम्भ गरेको हो ।
खेल सुरु भएको ५ मिनटमै घरेलु टिम श्रीपुरका खेलाडी राकेश राईले पहिलो गोल गरेर टिमलाई अघि बढाएका थिए । तर, ९ मिनटमै साउनेका खेलाडी मनिष राईले जवाफी गोल गर्दै खेललाई बराबरी बनाए । २५ मिनटमा सलन राईको थप गोलबाट दोब्बरले अघि बढेको साउने अर्का खेलाडी आशिष राईको तेस्रो गोल पनि थपियो ।
भोलिको खेलमा वडा नम्बर ८ राजाबास र १० बोक्सेको ईलाभेन स्टार क्लबबीच प्रतिस्पर्धा हुने आयोजक क्लबका सचिव चन्द्र राईले बताएका छन् ।
५ नं. वडा कार्यालयको प्रायोजन र श्रीपुर फुटबल क्लबको संयोजनमा आयोजित प्रतियोगिता स्थानीय जनता माध्यमिक विद्यालय श्रीपुरको खेलमैदान भईरहेको छ ।
आयोजक क्लबका अध्यक्ष विष्णु भुजेलका अनुसार ५ नम्बर वडाध्यक्ष उद्धव थापाले उद्घाटन गरेको प्रतियोगिता आउँदो २९ गतेसम्म सञ्चालन हुनेछ ।
प्रथम पुरस्कार ४० हजार नगद र ट्रफि रहेको प्रतियोगिताको उपविजेतालाई २० हजार नगदसहित मेडल र प्रमाणपत्र प्रदान गरिने छ ।
त्रियुगा १४ साउने, ५ श्रीपुर ए र बी, त्रियुगा ६ जलजले, ८ राजाबास, १० बोक्से, १२ डिएमगेट र १३ असारी गरि ८ समूहको सहभागिता रहेको प्रतियोगिताको फाईनल खेल २९ गते शनिबार हुनेछ ।