१७ घण्टा अघि
२0८१ चैत्र २१ शुक्रबार
उदयपुर, चैत २२
गाईघाटका विभिन्न आधादर्जन मेडिकलहरु नियमविपरित सञ्चालन भएको पाइएको छ । जिल्ता प्रशासन कार्यालय उदयपुरको छड्के अनुगमनमा यस्ता पसलहरु कारबाहीमा परेका छन् ।
सहायक प्रमुख जिल्ला अधिकारी विक्रम पाण्डे नेतृत्वको टोलीले बिहीबार दिउँसो गरेको अनुगमनमा नियमविपरित सञ्चालित ६ वटा औषधी पसल तथा फार्मेसीलाई चेतावनी दिएर छाडिएको छ । गाईघाटका १३ मेडिमलमा टोलीले अनुगमन गर्दा नियम पूरा नगरी सञ्चालित ती मेडिकलहरुलाई एकपटकका लागि चेतावनी दिएर छाडेको सहायक सिडिओ पाण्डेले बताए ।
मेडिकलको मापदण्ड नपुर्याएको साथै म्याद गुज्रेको औषधी बेचेको र अनुमति बिना सञ्चालन गरेकोहरु पनि भेटिएको पाण्डेको भनाई छ । त्यस्तै मेडिकल बोड राखेर खाद्य सामग्री बेच्ने गरेको तथा आवश्यक सरसफाई नभएको, दर्ता गरेकोभन्दा फरक ठाउँमा सञ्चालन रहेको कमजोरी भेटिएको छ ।
त्यस्ता मेडिकल पसलहरुलाई आफुले गरेको गल्ती महसुस गराउँदै तत्कालै सच्चिन अनुगमन टोलीले निर्देशन दिएको उनले बताए । यदि आउँदा दिनहरुमा पनि गल्ती फेला परे सिधै कानुनी कारबाही प्रक्रियामा लाने चेतावनी दिइएको टोलीले जनाएको छ ।
पाण्डे नेतृत्वमा जिल्ला प्रहरी, घरेलु तथा साना उद्योग, करदाता सेवा कार्यालय, स्वास्थ्य कार्यालय, जिल्ला अस्पताल, आयर्वेद स्वास्थ्य केन्द्र, त्रियुगा नगरपालिका, उद्योग बाणिज्य सङ्घका प्रातिनिधि संलग्न संयुक्त टोलीले अनुगमन गरेको हो ।
प्रमुख जिल्ला अधिकारी प्रेमप्रसाद लुईटेल र सहायक प्रजिअ पाण्डे दुवै उदयपुका नयाँ प्रशासक हुन् । महिना दिनअघि मात्र सरुवा भएर आएका प्रशासकहरुले जिल्लाको बजार र जनजीवन बुझ्ने काम गरिरहेका छन् ।
गाईघाटसहित जिल्लाको पश्चिममी व्यापारिक केन्द्र कटारी र घुर्मी, पूर्वमा चौदण्डीगढी नगर केन्द्र बेलटार, बेलका नगर केन्द्र रामपुर, रौतामाईको मर्कुची बजार र उदयपुरगढीको नेपालटार बजारहरु छन् ।ती बजार सहरोन्मुख भएकाले पनि कैयौँ मापदण्डविपरितका मेडिकल सञ्चालनमा रहेको स्थानीयको गुनासो छ ।
प्रशासनले सबैतिरको बजार अनुगमनलाई तिब्र बनाउनु पर्ने माग बेलाबेलामा गर्दै आएका छन् ।
