१ दिन अघि
२0८१ चैत्र १९ बुधबार
कटारी, चैत २०
पश्चिमी व्यापारिक केन्द्र कटारी बजारबाट ठूलो परिमाणको लागूऔषध, नगद र मोटरसाईकलसहित आधाजर्जन बढी पक्राउ परेका छन् । पक्राउ पर्नेमा एक किशोरी पनि छिन् ।
ईलाका प्रहरी कार्यालय कटारीबाट खटेको टोलीले मङ्गलबार कटारी नगरपालिका ४ कान्छी बजारबाट कटारी नगरपालिका ७ बस्ने वर्ष २९ का हरिबहादुर तामाङ, कटारी ८ बस्ने वर्ष १९ का भक्तबहादुर तामाङ, सोही वडाका वर्ष २५ का सोमकृष्ण राईलाई पक्राउ गरेको जनएको छ ।
त्यस्तै कटारी ४ का २३ वर्षीय अनमोल मगर, ४ कै २० वर्षकी आरती राउत, सोही वडा बस्ने वर्ष २३ का सरदकुमार सुनुवार र ४ कै १९ वर्षीय बिक्रम साशंकार रहेका छन् ।
उनीहरुको साथबाट प्रहरीले ट्रुपन ट्याब्लेट ४ हजार ४ सय ३१ थान, स्पासपेन ५, हजार ९ सय १२ र टेपेन्ट्रा लागूऔषध गरि जम्मा १० हजार ४ सय ६३ ट्याबलेट बरामद गरेको छ । त्यसैगरी १ सय ग्राम प्रतिबन्धित गाँजा तथा नगद २ लाख ४७ हजार ७ सय २० रुपैया बरामद भएको जिल्ला प्रहरी कार्यालयका सूचना अधिकारी डिएसपी केदारमान दोङले बताएका छन् ।
डिएसपी दोङका अनुसार उनीहरु सवार प्र १-०५-००१ प ७६०२ नं. को २२० सिसीको. कालो रातो रंगको पल्सर मोटरसाईकल र प्र १-०५-००१ प ७४९७ नं. को २०० सिसीको कालो फुस्रो रंगको एनएस मोटरसाईकल तथा ६ वटा मोबाईल पनि बरामद भएको छ ।
कटारी कान्छी बजारमा प्रतिबन्धित लागुऔषध ओसारपसार तथा बिक्रिवितरण भईरहेको भन्ने सुचना प्राप्त भएपछि ईप्रका कटारीले प्रहरी निरीक्षक भीमलाल ओलीको कमाण्डमा टोली खटाउँदा सो समूह पक्राउ परेको हो । लागूऔषध सेवन तथा कारोबारमा संलग्न ७ जना व्यक्ति, नियन्त्रित तथा प्रतिबन्धित लागुऔषध, नगद, मोटरसाईकल र मोबाईल फोन नियन्त्रणमा लिएर अनुसन्धान सुरु भएको छ ।
पक्राउ सबैलाई हिरासतमा राखेर कानुनी कारबाही अघि बढाइएको प्रहरीले जनाएको छ । उनीहरुमाथि थप अनुसन्धानका लागि बुधबार अदालतबाट म्याद लिने तयारी भईरहेको डिएसपी दोङले बताईका छन् ।
