३ हप्ता अघि
२0८१ फाल्गुन २९ बिहीबार
उदयपुर, फागुन २९
बढ्दो गर्मी र सुख्खा मौसममा डढेलो र आगलागीबाट बँच्न डिभिजन वन कार्यालय उदयपुरले पूर्व तयारीस्वरुप सुरक्षा निकायलाई अग्नि नियन्त्रक उपकरण दिएको छ । विगतमा जस्तो डढेलो र आगलागीबाट कतै क्षति नहोस् भन्ने उदेश्यले बेलैमा सतर्कता अपनाउँदै डिभिजनले सुरक्षा निकायलाई सामग्री दिएको हो ।
बुधबार दिउसो डिभिजन कार्यालयमा आयोजित एक कार्यक्रममामा नेपाल प्रहरी, सशस्त्र प्रहरी बल र नेपाली सेनालाई अग्नि नियन्त्रक सामग्री दिइएको हो । सहायक वन अधिकृत जागेश्वर साहका अनुसार गर्मी र सुख्खा याममा आगलागी र डढेलोका घट्ना वर्षेनी हुँदै आएकाले त्यसबाट हुने जनधनको क्षति रोक्न डढेलो अग्नि नियन्त्रक सामग्री सुरक्षा निकायलाई दिइएको बताए ।
सङ्घीय सरकारको स्वीकृत वार्षिक कार्यक्रम अन्तर्गत ‘राष्ट्रिय वन व्यवस्थापन कार्यक्रम अन्तर्गत’ सशर्त ३ लाख ५० हजार रुपैँयाको सामग्री खरिद गरी सुरक्षा निकायलाई वितरण गरिएको निमित्त डिभिजन वन अधिकृत रामभक्त यादवले बताए । उनका अनुसार वितरण गरिएका सामग्रीहरुमा डढेलो लाग्दा तत्काल निभाउने ब्याकवाटर पम्प, फायर ¥याक, जम्प सुट र फायर साबेललगायत छन् ।
वर्षेनी रास्ट्रिय र सामुदायिक वन समूहको जङ्गल डढेलो र आगलागीले व्यापक क्षति गर्ने गरेको घट्नाबाट सचेत हुँदै बेलैमा अग्नि नियन्त्रण सामग्री वितरण गरिएको यादवले बताए । सामग्री वितरण कार्यक्रममा प्रमुख जिल्ला अधिकराी हरिप्रसाद घिमिरेसहित जिल्लाका ४ वटै सुरक्षा निकाय प्रमुखहरु सहभागी थिए । सिडिओ घिमिरेले डढेलो र आगलागीजस्ता घट्ना हुन नदिन बेलैमा पूर्व तयारीमा लाग्र्ने डिभिजनको योजना प्रशंसनीय भएको बताए ।
उदयपुर चुरे महाभारत पर्वत तथा तरी जङ्गलले घेरिएको पर्याप्त जङ्गल भएको जिल्ला हो । कुल २ लाख १९ हजार ५ सय १ हेक्टर क्षेत्रफल रहेको उदयपुरमा १ लाख ४५ हजार ४ सय ९६ हेक्टर वन क्षेत्रले ओगटेको छ । डिभिजन वन कार्यालय गाईघाटमातहत मात्र ७४ हजार ४ सय ७८ हेक्टर जङ्गल क्षेत्र रहेको छ ।
२५ हजार २ सय ३४ हेकटर अर्थात ३३.८८ प्रतिशत हिस्सा जङ्गल राष्ट्रियय वन अन्तर्गत र ४९ हजार २ सय ४४ हेक्टर अर्थात ६६.११ प्रतिशत हिस्सा सामुदायिक वन उपभोक्ता समूह अन्तर्गत रहेको डिभिजन वन कार्यालयको अभिलेखमा उल्लेख छ । जस अनुसार गाईघाट डिभिजन अन्तर्गत मात्र ९ सय १२.८ हेक्टर वनक्षेत्र रहेको छ भने सामुदायिक वन समूह २ सय ८ वटा क्रियासिल रहेका छन् ।
