वडा भवन बनाउन जग्गा दान गर्नेलाई सम्मान

३ हप्ता अघि

कटारी, फागुन २६

कटारी नगरपालिकाले वडा भवन बनाउन जग्गा दान गर्ने रामकुमार राई र सीता राईलाई सम्मान गरेको छ । वडा नं. ५ को भवन बनाउनका लागि झण्डै २ करोड मूल्य बराबरको जग्गा निःशूल्क दिने कटारी गाविसका पूर्व अध्यक्ष तथा काँग्रेस नेता रामकुमार राई परिवारलाई सम्मान गरिएको हो । 

सोमबार नयाँ भवन उद्घाटनको क्रममा राई परिवारलाई सम्मान गरिएको हो । नगरप्रमुख राजेशचन्द्र श्रेष्ठ, उपप्रमुख गीता खड्का, प्रमुख प्रशासकीय अधिकृत राजमणि निरौला र ५ नंं वडाध्यक्ष मोहनसिंह तामाङले संयुक्त रुपमा भवन उद्घाटन गरेसँगै नवनिर्मित वडा भवनबाट सोमबारदेखि नियमित कामकाज सुरु भएको छ । 

कटारीका पूर्व अध्यक्ष राईले आफ्ना दिवंगत हजुरबुबा पूर्वमन्त्री डिल्लीशेर राई, हजुरआमा भगवति राई, बाबु समाजसेवी काशीराज राई र आमा विष्णुमाया राईको स्मृतिमा ४ कठ्ठा क्षेत्रफल जमिन दान दिएका थिए । सो जग्गामा ३३ लाख रुपैयामा वडा भवन निर्माण भएको छ । भवन ४ कोठे एकतले रहेको वडाध्यक्ष तामाङले बताए । 

भवन नहुँदा बिगत ७ वर्षयता भाडाको घरमा कार्यालय सञ्चालन गरिदै आएको थियो । पूर्व अध्यक्ष तथा काँग्रेस नेता राईले आफन्तजनको स्मृतिमा जमिन दिएपछि भवन बनाउन सफल भएको वडाध्यक्ष तामाङको भनाई छ । 

भवनको उद्घाटन गर्दै मेयर श्रेष्ठले करोडौँको जमिन निःशूल्क दिने कटारीका पूर्व अध्यक्ष तथा काँग्रेस नेता रामकुमार राईको मुक्त कण्ठले प्रशंसा गरे । नेता राईको आकाशजस्तै फराकिलो छाति भएकैले २ करोड मूल्यबराबरको जमिन वडालाई निःशूल्क प्राप्त भएको भन्दै राईको योगदान सधैका लागि अमर रहने मेयर श्रेष्ठले बताए । 

यो भवन उद्घाटनसँगै कटारीका १४ वटै वडाहरु भवनयुक्त हँुदै गएको भन्दै भौतिक पूर्वाधार संरचनायुक्त बनाएर नगरबासीलाई सहज, सरल र छिटोछरितो सेवासुविधा उपलब्ध गराउन आफुहरु प्रतिबद्ध रहेको मेयर श्रेष्ठको प्रतिबद्धता थियो । 

कार्यक्रममा जग्गादाता राईले दिवंगत बाजे पूर्वमन्त्री डिल्लीशेर राई र बजु तथा आपा आमाको स्मरण सधैभरी ताजा राख्न जमिन दान गरेको बताए । जग्गा अभावमा भवन नहुँदा वडाबासीले दुःख पाएको भन्दै जनताको सेवा नै बाउबाजे र आफ्नो मुख्य उदेश्य भएकाले महँगो मूल्यको जमिन दिएको उनले बताए ।