३ हप्ता अघि
२0८१ फाल्गुन २३ शुक्रबार
गाईघाट, फागुन २३
सदरमुकाम गाईघाटको भित्री सडकमा पिकअप भेनले ठक्कर दिँदा २ बालिकाको निधन भएको छ । त्रियुगा नगरपालिका १२ भिएमगेट पश्चिम भित्री सडकदेखि नयाँ बसपार्कतर्फ जाँदै गरेको प्र १–०५–००१ च ००९१ नम्बरको बोलेरो जीप अनियन्त्रित भई ठक्कर दिँदा एकाघरका दिदीवहिनी १२ वर्षीय देवी दास र १४ वर्षीया अनु दासको ज्यान गएको हो ।
जिल्ला ट्राफिक हवल्दार भुवन राईका अनुसार विहीबार राति ८ः०० बजे भएको दुर्घटनामा परेका दुवै बालिकालाई उद्धार गरी जिल्ला अस्पताल लगिएकोमा अस्पतालले मृत घोषित गरेको थियो । मृतक किशोरीद्वय सप्तरी स्थायी घर भई राजेन्द्र मैनालीको घर भाडामा लिएर बस्दै आएका ललन दासका छोरीहरु भएको हवल्दार राईले बताए ।
जीप हिमशिखर फर्निचरको सामान बोकेर कारखानातर्फ जाँदै गर्दा दुर्घटना भएको प्रारम्भिक अनुसन्धानले देखाएको छ । प्रारम्भिक अनुसन्धानमा चालक मदिरा सेवन गरेकाले दुर्घट्ना भएको देखाए पनि विस्तृत तथ्य थप अनुसन्धानपछि मात्र पत्ता लाग्ने प्रहरी भनाई छ ।
जीपलाई तत्कालै प्रहरीले नियन्त्रणमा लिएको छ भने घट्नालगत्तै फरार भएका चालक त्रियुगा नगरपालिका ९ गैरुनका १८ वर्षीय निर्जल कटुवाल पनि केही घण्टापछि राति नै नियन्त्रणमा लिइसकिएको छ ।
मृतकहरुको शब पोष्टमार्टमका लागि जिल्ला अस्पताल उदयपुरमा राखिएको प्रहरीले जनाएको छ ।
