उदयपुरका २ सहित आधादर्जन युवा लागूऔषध आरोपमा पक्राउ 

३ हप्ता अघि

उदयपुर, फागुन २२

उदयपुरको चौदण्डीगढी नगरपालिकाका २ युवा लागूऔषधसहित पक्राउ परेका छन् । इलाका प्रहरी कार्यालय बेल्टारको गस्ती टोलीले चौदण्डीगढी ६ स्थित बेलटारबाट बुधबार साँझ १९ वर्षीय सन्जिब राई र १८ वर्षीय अनिल राईलाई नियन्त्रणमा लिएको हो । 

उनीहरुको साथबाट ट्रामाडोल ८९ क्याप्सुल र स्पास्पेन ८९ ट्याब्लेट बरामद भएको छ । पक्राउ उनीहरुलाई हिरासतमा राखेर थप अनुसन्धान सुरु भएको प्रहरीले जनाएको छ । 

बुधबारै झापा र मोरङबाट थप ४ युवालाई लागूऔषधसहित पक्राउ गरेको प्रदेश प्रहरी कार्यालय विराटनगरले जनाएको छ । इलाका प्रहरी कार्यालय मधुमल्लाको टोलीले मोरङ मिक्लाजुङ गाउँपालिका ७ का २४ वर्षीय राजन राईलाई पक्रेको छ । विशेष सूचनाका आधारमा घरैबाट पक्राउ राईको साथबाट प्रतिबन्धित ट्रामाडोल २ सय क्याप्सुल तथा स्पासरेष्ट १ सय ६० ट्याब्लेट बरामद भएको छ । 

उता मोरङकै इप्रका पथरीको टोलीले पथरीशनिश्चरे नगरपालिका १ का २० वर्षीय आकाश कँडेललाई पनि ट्रमाडोल र स्पासपेन गरी १ सय ४० चक्कीसहित पक्राउ गरेको छ । 

त्यसैगरी इप्रका दमकको टोलीले दमक नगरपालिका ६ बाट झापाकै कमल गाउँपालिका ६ मा बस्दै आएका २६ वर्षीय रामकुमार महतो र दमक १ का १९ वर्षीय बिधान तामाङलाई पक्रेको छ । प्र १–०१–००२ ह ६६०५ नम्बरको सिटी सफारी चालक महतो सुनसरी हरिनगराका स्थायी बासिन्दा हुन् । महतो र सिटीमा सवार तामाङको साथबाट ट्रामाडोल ७० क्याप्सुल र स्पास्पेन ७० चक्की बरामद भएको प्रदेश प्रहरीले जनाएको छ ।  

यता सुनसरीको धरान उपमहानगरपालिका २० बाट प्रहरीले हवाई फायर गर्दै गाँजासहित धनकुटा साँगुरीगढी नगरपालिका ९ का ४३ वर्षीय हरिकुमार राईलाई पक्रेको छ । विहीबार विहान १ः०० वजेको समयमा इलाका प्रहरी कार्यालय धरान, वडा प्रहरी कार्यालय धरान र अस्थायी प्रहरी पोष्ट जोरसखुवाको संयुक्त टोलीले उनलाई पक्रेको हो ।

राईलाई पक्राउ गर्न ३ राउण्ड हवाई फायरसमेत गर्नु परेको प्रहरीले जनाएको छ । प्रहरीले घट्नास्थलबाट ९ वटा भारीमा तयार २ सय २५ किलो गाँजा फेला पारेको छ । सो घट्नामा संलग्न अन्य व्यक्तिहरु प्नि हुनसक्ने भन्दै खोजतलास र थप अनुसन्धान सुरु भएको प्रदेश प्रहरी प्रवक्ता एसएसपी भीम दाहालले बताएका छन् ।