बङ्शीलाघाट पुल निर्माणमा चरम ढिलाई 

४ हप्ता अघि

वङ्शीलाघाट, फागुन २०

उदयपुरको चौदण्डीगढी र खोटाङको बाराहापोखरीलाई जोड्ने बङ्शीलाघाटस्थित सीमानाका सुन नदीमा निर्माणाधीन पक्की मोटरेबल पुलको काम लामो समयपछि सुचारु भएको छ । ३३ महिनामा सकेर हस्तान्तरण गर्ने सम्झौता भएको काम ५ प्रतिशतमा सीमित गरेर निर्माण कम्पनी हिडेपछि पुलको काम अलपत्र परेको थियो । 

निर्माणस्थल (साईट) जाने कच्ची सडक अप्ठेरो र साँघुरो भएकाले यन्त्र उपकरण र निर्माण सामग्री पु¥याउन नसकेर सुरु गरेको केही समयपछि नै छाडेर हिडेको ठेकेदार फर्केर भखैरदेखि काम सुचारु गरेको हो । सडक मर्मतपछि यन्त्र उपकरण र सामग्री पु¥याएर काम सुचारु गरेको निर्माण प्रतिनिधिले जनाएका छन् । 

बङ्शीलाघाट चौदण्डीगढी १ र बाराहापोखरी ६ बीचमा पर्ने खोटाङको दक्षिण–पूर्वी भेगका बासिन्दालाई चौदण्डीगढी केन्द्र बेलटार हुँदै तराईभेगलाई जोड्ने प्रमुख नाका हो । दैनिक सयौँको सङ्ख्यामा  आउजाउ गर्ने सो नाकामा ४ दशकअघि निर्मित जीर्ण झोलुङ्गे पुल गत असोज १२ गते रातिको बाढीले भत्काएपछि नदी वारपार गर्नै नसक्ने अवस्था भएको थियो । 

तर, केहीदिनपछि दुवै जिल्लाका उपभोक्ताले स्थानीय काठ र बाँसको प्रयोग गरी मर्मत गरेपछि अहिले पुल आउजाउ गर्न काम चलाऊ भएको छ । तर, कुनै पनि बेला फेरि भत्कने जोखिम भएकाले निर्माणाधीन पक्की पुल छिटोभन्दा छिटो सक्नुपर्ने उपभोक्ताको माग छ । 

सप्तरीको फत्तेपुर बजार हुँदै उदयपुरको चौदण्डीगढी ५ शिवाई, ६ र ७ नं. वडामा पर्ने नगरमुकाम बेलटार बजार भएर खोटाङतर्फ चिसापानीदेखि सदरमुकाम दिक्तेल जोड्ने  नाका हो बङ्शीलाघाट । खोटाङको दक्षिण पूर्वी भेगका बाराहापोखरी, साकेला, जन्तेढुङ्गा, खोटेहाङ र भोजपुरका पश्चिम दक्षिणीभेगबासीलाईसमेत उत्तिकै महत्वपूर्ण नाका भएकाले बङ्शीलाघाटको पुल अत्यन्त महत्वपूर्ण मानिएको छ । 

उदयपुर १ (क)का प्रदेश साँसद राजन किरातीले बङ्शीलाघाटको पुललाई जत्ति महत्व दिनुपर्ने हो त्यो नभएकोमा गम्भीर ध्यानाकर्षण गराएको बताए । खोटाङ, भोजपुर र उदयपुर मात्र नभएर तराईभेगसँग सोझो जोडिन भएकाले यो नाका अत्यन्त महत्वपूर्ण रहे पनि काम चरम ढिला भईरहेको साँसद किराती बताउँछन् । 

तर, ठेकेदार कम्पनीले अत्यन्त ढिला काम गरेको भन्दै उनले प्रमुख ठेकेदार कम्पनी कालिका कन्स्ट्रक्सनलाई ध्यानाकर्षण गराउँदा साझेदार (जेवी)लाई जिम्म दिएको भन्दै टार्ने गरेको किरातीले बताए । ‘बङ्शीलाघाट खोटाङ र उदयपुर मात्र होईन, तराईका सप्तरी, सुनसरी, मोरङलगायत जिल्लासँग खोटाङ र भोजपुरबासीको सोझो आउजाउ हुने नाका हो’ साँसद किरातीले भने ‘त्यसैले छिटो बनाउन पटकपटक ठेकेदारलाई ताकेता गरिरहेको छु ।’

सो पुल बनाउन ०८० असोज २७ गतेभित्र अर्थात २ वर्ष ९ महिना अवधिमा सम्पन्न गरेर हस्तान्तरण गर्ने गरी ०७७ पुस २८ गते सम्झौता भएको थियो । एमएस÷कालिका÷बेदान्सी जेवीले काम गर्ने जिम्मा पाएको पुलको डिजाईन र इस्टीमेटसमेत आफैले गर्नुपर्दा २ वर्ष बढी समयसम्म काम सुरु नभएको निर्माणपक्षको दावी छ । ठेकेदार कम्पनीले सम्झौता गरे पनि पुल बनाउने ठाउँसम्म जाने सडक असुविधाले गर्दा सामान र यन्त्र उपकरण पु¥याउन नसकेर पनि समयमा काम सुरु गर्न नसकेको जिकिर गरेको छ । 

तोकिएको अवधिमा काम नहुने भएपछि पहिलो चरण आउँदो असार मसान्तसम्मको म्याद थपिएको छ । अहिले थपेको म्याद सकिन ५ महिना मात्र बाँकी रहँदा भर्खर मात्र काम सुचारु भएको छ । निर्माण कम्पनी प्रतिनिधि किरण श्रेष्ठले सरासर काम भए पनि २ वर्ष लाग्ने जनाएका छन् । साईटसम्म पुग्ने सडकै नभएकाले बेलामा निर्माण सामग्री लान नसकेर काम ढिला भएको कारण खुलाए । 

बेलटारदेखि बङ्शीलाघाट खण्डको सडक साँघुरो ट्र्याक रहेकाले पनि निर्माण सामग्री बोकेर लाने गाडीहरु समस्या भएको उनले बताए । गतवर्ष पहिलो पटक ठेकेदार कम्पनी आफैले स्काभेटर प्रयोग गरी सडक कामचलाऊ फराकिलो बनाएर निर्माण सामग्री साईटसम्म लगेर काम थालेको थियो । यसवर्ष पनि सडक सुधार गरेर मात्र सामान पु¥याएर काम सुचारु गरेको श्रेष्ठले बताए ।

चैदण्डीगढीका पूर्व नगरप्रमुख खगेन्द्र राईले त्यहाँ पुल बनाउने टुङ्गो ०७५ सालमै लागेको बताउँदै तर, सम्झौता गरेको यतिका समयसम्म पनि कामले गति लिन नसक्नु दुखद भउको बताए । पुलको ठेक्का लिएको कम्पनीले नै डिजाईन र इस्टीमेट पनि गर्नुपर्ने भएकाले पनि काम ढिला भएको भन्ने बुझेको उनले बताए । 

सम्झौता भएको लगभग ४ वर्षसम्म लगभग १० प्रतिशत हाराहारी मात्र काम भएको पुल सम्पन्न हुन निकै समय लाग्ने भएकाले तदारुक्ताका साथ काम गर्न स्थानीयहरुले आग्रह गरिरहेका छन् । तर, सडक साँघुरो भएकैले पनि सामान लान समस्या भएर काम ढिला भएको स्थानीय गोपाल राई बताउँछन् । 

सेक्टर १ ईटहरी, सुनसरीका कार्यालयका सूचना अधिकारी इन्जिनियर आविष्कार तिम्सीनाले १ सय ५० मिटर लामो तथा पैदल कवलसहित ११ मिटर चौडाईको उक्त पुल मूल्य अभिबृद्धि कर (भ्याट)सहित १९ करोड १८ लाख ४१ हजार ४ सय रुपैँयामा ठेक्का लागेको पुल निर्माणको रेखदेख गर्ने कार्यालय पुल विविध कारण देखाएर काम ढिला भइरहेको बताउँदै छिटो काम गर्न निर्माण व्यवसायीलाई दबाब दिदै आएको बताए ।