१ महिना अघि
२0८१ फाल्गुन १९ सोमबार
बेलटार, फागुन १९
उदयपुरको चौदण्डीगढी नगरपालिकाका ३ युवा लागूऔषधसहित पक्राउ परेका छन् । इलाका प्रहरी कार्यालय बेलटारको टोलीले आईतबार दिउँसो चेकजाँचको क्रममा लागूऔषध फेला परेपछि उनीहरुलाई पक्राउ गरेको हो ।
पक्राउ पर्नेमा चौदण्डीगढी नगरपालिका ७ का १९ वर्षीय सागर बिश्वकर्मा, २१ वर्षीय सञ्जोक राई र २१ वर्षीय निशान मगर रहेका छन् । प्रहरीले उनीहरुको साथबाट ट्रामाडोल १ सय २० एम्पुल, स्पास्पेन १ सय ट्याब्लेट बरामद भएको प्रदेश प्रहरी कार्यालय विराटनगरले जनाएको छ ।
पक्राउ तीनैजनालाई प्रहरी हिरासतमा राखेर अनुसनधान सुरु भएको छ ।
त्यसैगरी आईतबारै झापाका विभिन्न ठाउँबाट थप ३ युवा पनि लागूऔषधसहित पक्राउ परेका छन् ।
प्रदेश प्रहरी प्रवक्ता एसएसपी भीम दाहालका अनुसार झापाको अस्थायी प्रहरी पोष्ट ताराबारीको गस्ती टोलीले मोरङ उर्लाबारी नगरपालिका ७ स्थायी घर भएका २१ वर्षीय बिजय शर्मा, २० वर्षीय पुजन गिरी र १८ वर्षीय सुजन शिवालाई पक्राउ गरेको छ । उनीहरुको साथबाट ट्रामाडोल ७३ चक्की, स्पास्पेन ८० एम्पुल बरामद भएको प्रदेश प्रहरी कार्यालयका सूचना अधिकारी एसएसपी भीम दाहालले बताएका छन् ।
त्यसैगरी वडा प्रहरी कार्यालय भद्रपुर झापाको टोलीले भद्रपुर नगरपालिका १ का २० वर्षीय प्रन्नयन तामाङलाई १ ग्राम २ मिलिग्राम ब्राउनसुगरसहित पक्राउ गरेको छ ।
उनीहरु सबैलाई सम्बन्धित प्रहरी कार्यालयमा राखेर अनुसन्धान भईरहेको प्रदेश प्रहरी प्रवक्ता एसएसपी दाहालले बताएका छन् ।
