१ महिना अघि
२0८१ फाल्गुन १९ सोमबार
उदयपुर, फागुन १९
उदयपुरमा जन्मेर राज्यको उपल्लोतहमा पुगेर सेवा गर्ने अवसर पाएका प्रधानन्यायाधीशसहित ४ जना विशिष्ट व्यक्तिहरुलाई गृहजिल्लामा सम्मान गरिएको छ । जिल्ला समन्वय समिति उदयपुर, त्रियुगा नगरपालिका, कटारी नगरपालिका, उदयपुरगवढी गाउँपालिकालगायत विभिन्न सङ्घ सँस्थाले उनीहरुलाई सम्मान गरेका हुन् ।
जिल्ला समन्वयले अघिल्लो दिउँसो प्रधानन्यायाधीश प्रकाशमानसिंह राउत, उद्योग मन्त्रालयका सचिव कृष्णबहादुर राउत, सार्वजनिक खरिद अनुगमन कार्यालयका सचिव मुकुन्द निरौला र अतिरिक्त प्रहरी महानिरीक्षक (एआईजीपी) टेकप्रसाद राईलाई सम्मान गरेको हो । उनीहरुलाई जिल्ला समन्वय प्रमुख गौरबहादुर विश्वकर्मा, उपप्रमुख चेतबहादुर गिरी, समन्वय अधिकारी गजेन्दनाथ शर्मालगायतले दोसल्ला, खादा र माला लगाईदिदै सम्मानपत्र प्रदान गरे ।
कार्यक्रममा उदयपुरबाट निर्वाचित प्रदेशसभा सदस्य (साँसद)हरु, जिल्लाका ८ वटै स्थानीयतहका प्रमुख, उपप्रमुख र अध्यक्ष उपाध्यक्ष तथा जिल्ला समन्वय समिति सदस्य र पूर्व जनप्रतिनिधिलगायत प्रमुख जिल्ला अधिकारी, प्रहरी प्रमुख, नेपाली सेना, सशस्त्र प्रहरी तथा राष्ट्रिय अनुसन्धान गरी तीनवटै सुरक्षा निकाय प्रमुख तथा सरकारी कार्यालयका प्रमुख र प्रतिनिधिहरुको उपस्थिति थियो ।
प्रधानन्यायाधीश राउत उदयपुरको कटारीमा २०१७ साल चैत १८ गते जन्मेका हुन् । उनले त्रिभुवन विश्वविद्यालयबाट कानुन सङ्कायमा स्नातक सकेर ०३९ देखि अधिवक्ताको रुपमा न्यायक्षेत्रमा सेवा सुरु गरेका थिए । सर्वोच्च अदालतको वेबसाईटमा उल्लेख भए अनुसार ०६२ सालमा नेपाली वकिलहरुको सङ्गठन नेपाल बार एसोसिएसनको अध्यक्ष भएका राउतले ०६९ मा वरिष्ट अधिवक्ताको उपाधि पाएका थिए ।
०७१ मा सर्वोच्च अदालतको न्यायाधीशमा नियुक्त भएर सेवा गर्दै आएका राउत ०८१ असोज २० गते प्रधानन्यायाधीश नियुक्त भएका हुन् । उदयपुरमा जन्मेर प्रधानन्यायाधीश हुनेमा राउत अहिलेसम्मको पहिला उच्च पदस्थ न्यायमूर्ति हुन् ।
त्यसैगरी उद्योग मन्त्रालयका सचिव कृष्ण राउत उदयपुरकै रौतामाई ४ (साविक पोखरी गाविस, मालबासे)मा जन्मेका हुन् । सार्वजनिक खरिद अनुगमन कार्यालयका सचिव मुकुन्दप्रसाद निरौला उदयपुरगढी गाउँपालिका ५ (साविक पञ्चावती गाविसको केउरेनी)मा जन्मेका हुन् । एआईजी राई चौदण्डीगढी नगरपालिका ६ बेलटारका स्थायी बासिन्दा हुन् ।
यसअघि आईतबारै मध्यान्ह उनीहरुलाई त्रियुगा नगरपालिकाले सम्मान गरेको थियो भने शनिबार नेपाल बार एसोसिएसन उदयपुर एकाई र उदयपुरगढी गाउँपालिकाले सम्मान गरेको थियो । त्यसैगरी शुक्रबशार कटारी नगरपालिका, त्रिबेणी मावि कटारी, उदयपुर उद्योग बाणिज्य सङ्घ कटारी र उदयपुरे विद्यार्थी समाज काठमाडौँले सम्मान गरेका थिए ।
