१ महिना अघि
२0८१ फाल्गुन १८ आईतवार
धनुषा, फागुन १८
नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)ले मधेसी समुदायको पहिचानका लागि सबभन्दा बढी त्याग माओबादीले गरेको बताएका छन् । धनुषाको कमला नगरपालिका ३ स्थित पर्सामा आयोजित सहिद परिवारको सम्मान कार्यक्रममा बोल्दै प्रचण्डले मधेसीलगायत देशका उत्पीडित जाति, समुदाय र बर्गको अधिकार र पहिचान स्थापित गर्नका लागि माओबादीले धेरै त्याग र बलिदानी गरेको स्मरण गराएका हुन् ।
सहिद परिवारको सम्मान तथा जनभेटघाट कार्यक्रममा बोल्दै उनले महिला, आदिबासी जनजाति, दलित, मधेसी, मुस्लिम, थारुलगायत उत्पीडित र पिछडा बर्ग र समुदायको मुक्तिका लागि हजारौं सहिदले बलिदानी गरेको बताउँदै मधेसी जनताको मुक्तिका लागि १ हजार ३ सय मधेसी जनताका छोराछोरीले जनयुद्धमा बलिदानी गरेको बताए ।
मधेसीको मुक्तिका लागि यति ठूलो बलिदान गरेको माओवादीकै विषयमा अनेक थरी भ्रम सिर्जना गर्ने प्रयास भएको भन्दै अध्यक्ष प्रचण्डले अब यस्तो भ्रमको पर्दा च्यातेर माओवादी र मधेसी जनताबीच दह्रो एकता कायम गर्ने प्रयास भईरहेको बताए । मधेसी जनताको मुक्तिका लागि मधेसी राष्ट्रिय मुक्ति मोर्चा गठन गरेर मधेसी जनतामा जागरणको लहर ल्याएको, मधेस स्वायत्त जनसरकार गठन गरी सङ्घीयताको व्यवहारिक अभ्यास गरेको तथा संविधानमार्फत सङ्घीयत, समानुपातिक र समावेशी प्रतिनिधित्व स्थापित गराउँदै गणतन्त्र नेपालको पहिलो राष्ट्रपतिको रुपमा रामराजाप्रसाद सिंहलाई अघि सारेर मधेस विकासलाई प्राथमिकताका साथ बजेट विनियोजन गर्नेजस्ता महत्वपूर्ण काम माओबादीले नै गरेको उनको भनाई थियो ।
अध्यक्ष प्रचण्डले आफूलाई मधेसका मसिहा ठान्ने दलहरूबाट मधेसी जनताको मुक्ति संभव नभएको भन्दै मधेस मुक्तिको जिम्मा सम्पूर्णरुपमा माओवादीले नै लिने प्रतिबद्धता व्यक्त गरे । पार्टीका सबै पदाधिकारी अहिले मधेसमै रहेको र मधेसी पोशाकमै प्रस्तुत भएको प्रसङ्ग कोट्याउँदै उनले यो पोशाक मात्रै नभई आफूहरुको मन पनि मधेसमै छ भन्ने विम्व भएको स्पष्ट पारे ।
