प्रधानन्यायाधीश राउतलाई सम्मानको चटारो

१ महिना अघि

कटारी, फागुन १७

प्रधानन्यायाधीश प्रकाशमानसिँह राउतलाई गृहजिल्लामा सम्मानको चटारो छ । शुक्रबार गृहनगर कटारी आईपुगेका राउतलाई कटारी नगरपालिकाले सम्मान गरेलगत्तै कटारीस्थित त्रिबेणी माध्यमिक विद्यालय, उदयपुर उद्योग बाणिज्य सङ्घ कटारी र उदयपुरे विद्यार्थी समाज काठमाडौँले गरेको सम्मान थाप्दै झमक्क साँझ पर्यो । 

शनिबार विहाने उदयपुरगढी गाउँपालिकाको सम्मान थाप्न पुगेका राउत मध्यान्ह नेपाल बार एसोसिएसन उदयपुर एकाई र राउत सेवा समाज गाईघाटको सम्मान लिन समय निकाले । आईतबार जिल्ला समन्वय समिति उदयपुरले उनीसहित २ मन्त्रालयका सचिवलाई सम्मान गर्ने कार्यक्रम रहेको छ । जिल्ला समन्वय अधिकारी गजेन्द्रनाथ शर्माका अनुसार उदयपुरमा जन्मेर राष्ट्रको उच्च ओहदामा पुग्न सफल भएको भन्दै प्रधानन्यायाधीश राउतसहित नेपाल सरकारका २ सचिवलाई समन्वय समितिले सम्मान गर्न लागेको हो । 

जस अनुसार प्रधानन्यायाधीश राउतसँगै उद्योग मन्त्रालयका सचिव कृष्णबहादुर राउत र सार्वजनिक खरिद अनुगमन कार्यालयका सचिव मुकुन्दप्रसाद निरौलालाई सम्मान गर्न लागिएको हो । 

०१७ साल चैतमा कटारीमा जन्मेका राउतलाई गृहनगर कटारी नगरपालिकाले दोसल्ला ओढाउनुका साथै मायाको चिनो र सम्मानपत्र प्रदान गरेको छ । नगरप्रमुख राजेशचन्द्र श्रेष्ठ, उपप्रमुख गीता खड्का, प्रमुख प्रशासकीय अधिकृत राजमणि निरौला तथा वडाध्यक्षलगायत जनप्रतिनिधि र कर्मचारीहरुले राउतलाई सामुहिकरुपमा सम्मान गरेका हुन् । 

त्यसैगरी २०३३ सालमा उनले माध्यमिक तह (प्रवेशिका) उत्तीर्ण गरेको पूर्व विद्यार्थीको नाताले त्रिबेणी मावि कटारीले पनि राउतलाई सम्मान गरेको हो । विद्यालय व्यवस्थापन समितिका अध्यक्ष मणिराज दाहाल, शिक्षक अभिभावक सङ्घका अध्यक्ष मोहन कोईराला र प्रधानाध्यापक बालकृष्ण कार्कीलगायत शिक्षक र विद्यार्थीहरुले उनलाई सम्मान तथा मायाको चिनो प्रदान गरेका थिए । 

उदयपुर उद्योग बाणिज्य सङ्घ कटारीका अध्यक्ष जमानसिंह बस्नेतलगायतले बाणिज्य सङ्घमा सम्मान गरे भने उदयपुर विद्यार्थी समाज काठमाडाँैले पनि राउतलाई सम्मान गरेको छ । 

कटारीमै जन्मेका वरिष्ट अधिवक्ता शम्भु थापासँगै गृहजिल्ला आएका प्रधानन्यायाधीश राउतले कटारी २ स्थित महादेवस्थान मन्दिर पुगेर दर्शन तथा अवलोकन गरेको इलाका प्रशासन कार्यालय कटारीकी कार्यालय प्रमुख उपसचिव कोपिला राईले बताएकी छिन् । 

यता सदरमुकाम गाईघाटमा शनिबार विहान राउतलाई नेपाल बार एसोसिएसन उदयपुर एकाईले सम्मान गरेको छ । बारको सम्मानलगत्तै दिउँसो प्रधानन्यायाधीश राउतलाई राउत सेवा समाज उदयपुरले सम्मान गरेको छ । 

 
राजनीतिकर्मी, जनप्रतिनिधि, कर्मचारी, व्यापार व्यवसायी र सर्वसाधारणको उपस्थितिमा पाएको सम्मानले प्रफुल्लित प्रधानन्यायाधीश राउतले आफु पेशा र जागीरको सिसिलामा लामो समयदेखि राजधानी बस्दै आए पनि मन र मस्तिष्क सँधै जन्मेकै ठाउँ कटारी उदयपुरम रहेको र रहिरहने बताएका छन्  ।