१ महिना अघि
२0८१ फाल्गुन १७ शनिबार
सिराहा, फागुन १७
नेकपा (माओवादी केन्द्र)का अध्यक्ष पुष्पकमल दाहाल प्रचण्ड बलात्कारपछि हत्या गरिएकी रिङ्कु सदाको घरमा पुगेका छन् । सिरहाको नवराजपुर गाउँपालिका १ भगवतीपुरस्थित रिङ्कु सदाको घरमा पुगेर उनका अभिभावकलाई न्यायका लागि सहयोग गर्ने प्रतिबद्धता व्यक्त गरेका छन् ।
गत माघ २७ गते राति शौच गर्न घरबाहिर निस्केकी १७ वर्षीया रिङ्कुको सामुहिक बलात्कार भएको थियो । उनलाई स्थानीय ३ युवाले सामूहिक बलात्कार गरेको बताए पनि माघ २९ र ३० गते बसेको पञ्चायतले घटना मिलाउने प्रयास गरेको थियो । सो घटना सार्वजनिक भएको भोलिपल्ट ३० गते साँझ उनी आफ्नै घरमा शंकास्पद अवस्थामा मृत भेटिएकी थिइन् ।
प्रचण्डले रिङ्कुको परिवार र उनको पक्षमा वकालत गरिरहेको संघर्ष समितिलाई न्याय दिलाउने सक्दो पहल गर्ने वचन दिएका छन् । उनले पीडितलाई न्याय दिनको साटो पञ्चायत बसेर लेनदेनमा मिलापत्र गराउन खोज्नु लज्जास्पद भएको बताए ।
घट्नाबारे प्रहरीले विभिन्न कोणबाट अनुसन्धान गरिरहेको जानकारी दिएको बताउँदै उनले छानबिन प्रक्रिया चाँडो निष्कर्षमा पुर्याउन आग्रह गरे । रिङ्कुलाई न्याय दिलाउन मुसहर समुदायले गरिरहेको संघर्षप्रति पनि प्रचण्डले एक्यवद्धता जनाए । संघर्ष समितिले रिङ्कुकै घरमा एक कार्यक्रम गरी अध्यक्ष प्रचण्डसमक्ष आफ्ना मागपत्र प्रस्तुत गरेको थियो ।
प्रचण्डले तराई मधेसका विभेद, अपमान र अत्याचारका विरुद्ध आवाज उठाउन नै पार्टीले तराई मधेस जागरण अभियान सञ्चालन गरेको र यस्ता घटनाका विरुद्ध निरन्तर आवाज उठाउने प्रतिबद्धता व्यक्त गरेका यिए ।
