उदयपुरका '३ तारा'लाई भोलि सम्मान गरिने 

१ महिना अघि

गाईघाट, फागुन १६

उदयपुरमा जन्मेर देशको न्यायपालिका प्रमुख भएका प्रकाशमानसिंह राउत र नेपाल सरकारको विशिष्ट श्रेणी (सचिव) गरी जिल्लाका ‘३ तारा’लाई गृहजिल्ला उदयपुरमा सम्मान गरिने भएको छ । जिल्ला समन्वय समिति उदयपुरले सर्वोच्च अदालतका प्रधानन्यायाधीश राउत, उद्योग बाणिज्य तथा आपूर्ति मन्त्रालयका सचिव कृष्णबहादुर राउत र सार्वजनिक खरिद अनुगमन कार्यालयका सचिव मुकुन्द निरौलालाई सम्मान गर्न लागेको हो । 

उनीहरुलाई जिल्ला समन्वय समितिले शनिबार आफ्नै सभाकक्षमा सम्मान गर्ने तयारी गरेको छ । उदयपुरमा जन्मेर नेपाल सरकारको माथिल्लो निकाय प्रमुख भएर राष्ट्र र जनताको सेवा गर्दा उदयपुर र उदयपुृरेको नाम र इज्जत उचो बनाएको भन्दै उनीहरुलाई अभिनन्दन गर्न आमन्त्रण गरिएको जिल्ला समन्वय अधिकारी गजेन्द्र नाथले बताए । 

जिल्ला समन्वय समिति प्रमुख गौरबहादुर विश्वकर्माले उदयपुरको माटोमा जन्मेर देशको उच्च तहमा पुगी जिल्लाको मान र इज्जत राख्ने व्यक्तिहरुलाई सम्मन गर्न लागेको बताए। सर्वोच्च अदालतजस्तो न्यायपालिका प्रमुख भएकोमा प्रधानन्यायाधीश राउतलाई र मन्त्रालयको सचिवजस्तो विशिष्ट श्रेणीमा पुगेर सेवा गर्न सफल सचिवद्वयलाई सिँगो जिल्लावासीको तर्फबाट सम्मान गर्ने प्रमुख विश्वकर्माले बताए।  

प्रधानन्यायाधीश राउत उदयपुरको कटारीमा २०१७ साल चैत १८ गते जन्मेका हुन् । त्रिभुवन विश्वविद्यालयबाट कानुन सङ्कायमा स्नातक सकेर ०३९ सालमा अधिवक्ताको रुपमा न्याय क्षेत्रमा प्रवेश गरेका राउत ०६२ सालमा नेपाली वकिलहरूको सङ्गठन नेपाल बार एसोसिएसनको अध्यक्ष भएका थिए । सर्वोच्च अदालतको वेबसाइटमा उल्लेख भए अनुसार राउतले ०६९ मा वरिष्ट अधिवक्ताको उपाधि पाएर ०७१ मा सर्वोच्च अदालतको न्यायाधीशमा नियुक्त भएका थिए । 

१ दशकपछि राउत ०८१ असोज २० गते प्रधानन्यायाधीश नियुक्त भएका हुन्। उदयपुरमा जन्मेर प्रधानन्यायाधीश हुने राउत अहिलेसम्मकै पहिलो उच्च पदस्थ न्यायमूर्ति भएकाले सम्मानलायक रहेको जिल्लाबासीले बताएका छन् ।

सम्मान हुन लागेका कृष्णबहादुर राउत उद्योग मन्त्रालयका सचिव हुन् । उनी उदयपुरको रौतामाई गाउँपालिका ४ (साविक पोखरी गाविस, मालबासे)मा जन्मेका हुन् । त्यसैगरी उदयपुरगढी गाउँपालिका ५ (साविक पञ्चावती गाविसको केउरेनी)मा जन्मेका मुकुन्द निरौला सार्वजनिक खरिद अनुगमन कार्यालयका सचिव हुन् ।