१ महिना अघि
२0८१ फाल्गुन ४ आईतवार
खोटाङ, फागुन ४
खोटाङको त्रिधार्मिकस्थल हलेसीमा आईतबार साँझ आगलागी हुँदा हार्डवेयर पसलसहित ३ घर ध्वस्त भएको छ । हलेसी तुवाचुङ नगरपालिका ७ हलेसी मन्दिरनजिकै पदम राईको पुजा हार्डवेयर पसलमा साँझ ७ः३० बजे भएको आगलागीमा परी करोडौँ बराबरको क्षति भएको अनुमान गरिएको छ ।
वडाध्यक्ष कमल गिरीका अनुसार आगोले राईले सञ्चालन गरेको हार्डवेयर, छिमेकीहरु कैलाश राई र प्रकाशचन्द्र गिरीको घर ध्वस्त भएको छ । बीच बजारमा रहेको पुजा हार्डवेयरको मात्र ५ करोडभन्दा बढी क्षेति भएको प्रारमिभक अनुमान गरिएको वडाध्यक्ष गिरीले बताए ।
हलेसीकै ठूलो हार्डवेयर पसल भएकाले राई एक्लैको कम्तीमा ५ करोड बढीको क्षति भएको हुनसक्ने वडाध्यक्ष गिरीले बताए । अन्यको पनि घर र सामान जलेर क्षति भएको तर, क्षतिको यकिन अहिले भन्न नसकिने उनले बताए । ३ घर जलेकामध्ये २ वटा कच्ची र एउटा पक्की हो । हार्डवेयर पसलको घर र प्रकाशचन्द्रको कच्ची घर जलेको तथा कैलाश राईको चाहि पक्की घर ध्वस्त भएको उनले बताए ।
खोटाङका प्रमुख जिल्ला अधिकारी शिवबहादुर कार्कीले हार्डवेयर पसलबाट उब्जेको आगोले एक घण्टाभित्रै सबै सामान जलेर नजिकका २ घर पनि जलाएर धनमाल नष्ट भएको बताए । स्थानीय र सदरमुकामबाट ल्याइएका सुरक्षा फौजले आगो नियन्त्रणको प्रयास गरिरहेको उनले बताए । सिडिओ कार्कीले भने ‘आगो कसरी उब्जियो भन्ने कारण पत्ता लागिसकेको छैन ।’
जिल्ला प्रहरी कार्यालयका डिएसपी प्रतिक विष्टले लगभग अढाईघण्टामा आगो नियन्त्रणमा आएको बताए । तर, पनि पूर्णरुपमा ढुक्क हुने अवस्था नभएको र संक्रमण हुन नदिन स्थानीय जनप्रतिनिधि, हलेसीस्थित इलाका प्रहरी, सशस्त्र प्रहरी बलका साथै सदरमुकाम दिक्तेलबाट प्रहरी, सशस्त्र र नेपाली सेनाका जवानसहितको थफ सुरक्षा फौज बोलाएर खटाइएको बताएका छन् ।
सदरमुकाम दिक्तेल रुपाकोट मझुवागढी र हलेसी तुवाचुङ गरी २ नगरपालिका र ८ गाउँपालिका गरी १० वटा स्थानीयतह रहेको खोटाङमा अहिलेसम्म एउटा पनि दमकल नहुँदा आगलागी हुँदा धेरै समस्या पर्ने गरेको छ । वर्षेनी हुने आगलागीको क्षतिबाट बँच्न तत्काल दमकल खरिद गर्न पनि स्थानीय सञ्जय राईले सुझाएका छन् ।
