१ महिना अघि
२0८१ फाल्गुन ४ आईतवार
बेलका, फागुन ४
उदयपुरको पुरानो विद्यालयमध्येको एक बेलका नगरपालिका १ स्थित जनता माध्यमिक विद्यालय पुरन्दहले आधुनिक भवन पाएको छ । भारत सरकारको सहयोग र नगरपालिकाको साझेदारीमा विद्यालयले सुविधा सम्पन्न भवन पाएको हो ।
प्रत्येक तलामा ८ कोठाका दरले २४ कोठा रहेको ३ तले भवनमा बेग्लाबेग्लै छात्र छात्रा शौचालय, खानेपानी, विद्युत र फर्निचको व्यवस्था रहेको छ । प्रत्येक कोठामा ४० जना विद्यार्थी पढाउन मिल्ने विद्यालय भवन बनाउन भारतले ३ करोड बढी अनुदान दिएको छ । विद्यालयका प्रधानाध्यापक नारायण रायमाझीका अनुसार भवनमा ४ करोड ३३ लाख ५३ हजार ५ सय १ रुपैँया ३१ पैसा खर्च भएको छ । जसमा भारतले ३ करोड ७ लाख ३२ ह जार १ सय ३५ रुपैँया ४४ पैसा अनुदान दिएको छ भने स्थानीय लागत सहभागितावापत नगरपालिकाले १ करोड २६ लाख २१ हजार ३ सय ६५ रुपैँया ८७ पैसा खर्चेको छ ।
विद्यालय व्यवस्थापन समिति अध्यक्ष पुनिलाल चौधरीले आर्थिक वर्ष ०८०/८१ देखि निर्माण सुरु भएको भवन तोकिएको म्यादभन्दा ३ महिना ढिला सम्पन्न भएको बताए । उनका अनुसार ०८० जेठ ३० गते सम्झौता भएको भवन ०८१ असोज २ गतेभित्र निर्माण सक्नुपर्ने थियो । भवन निर्माणको काम समृद्धि सम्पन्न/विजय सृजना जेवी काठमाडौँले गरेको अध्यक्ष चौधरीले बताए ।
नवनिर्मित भवनको आईतबार विद्यालय प्राङ्गणमा आयोजितट एक कार्यक्रमका बीच भारतीय दुतावासका नियोग उपप्रमुख प्रशन्न श्रीवास्तव र उदयपुर निर्वाचन क्षेत्र १ का सङ्घीय साँसद डा. नारायण खड्काले संयुक्तरुपमा गरे । उद्घाटन गर्दै नेपाली काँग्रेसका केन्द्रीय सदस्य तथा पूर्वमन्त्रीसमेत रहेका खड्काले नेपालको शिक्षा, स्वास्थ्य, खानेपानीलगायत विकास निर्माण योजनामा भारतले अनवरत रुपमा सहयोग गर्दै आएको भन्दै धन्यबाद दिए ।
उनले आफ्नो निर्वाचन क्षेत्रमा दर्जन बढी विद्यालय तथा क्याम्पस भवन, स्वास्थ्यचोकी, खानेपानी योजनाहरु निर्माण गर्नमा भारतीय सहयोग दिदै आएको भन्दै यस्तो सहयोग निरन्तर राख्न आग्रह गरे । चालु वर्षकै योजना अन्तर्गत अन्य २ वटा विद्यालय भवन र खानेपानी योजना पनि सम्पन्न हुने क्रममा रहेको जानकारी पनि खड्काले दिए ।
कार्यक्रममा नगरप्रमुख अशोक कार्कीले बेलकाको शैक्षिक विकासमा प्राप्त भएको भारतीय सहयोग अतुलनीय रहेको भन्दै भारत सरकार र त्यसका प्रतिनिधित श्रीवास्तवप्रति आभार व्यक्त गरे । बेलका नगरकै पुरानो विद्यालयमध्यको एक मावि पुरन्दहको नवनिर्मित भवनले स्थानीय बालबालिकाको शैक्षिक प्रगतिमा उल्लेख्य सुधार आउने अपेक्षा गरेको पनि मेयर कार्कीले बताए ।
कार्यक्रममा बेलका नगर उपप्रमुख जीरा राई, त्रियुगा नगरप्रमुख बसन्त बस्नेत, चौदण्डीगढी नगर पूर्वप्रमुख खगेन्द्र राई, विभिन्न वडाका वडाध्यक्ष र जनप्रतिनिधि, प्रमुख जिल्ला अधिकारी हरिप्रसाद घिमिरे, प्रहरी प्रमुख हरिहरनाथ योगीलगायतको पनि सहभागिता थियो । उद्घाटनसँगै नयाँ भवनमा पठनपाठन हुन थालेको विव्यस अध्यक्ष चौधरीले बताएका छन् ।
