१ महिना अघि
२0८१ फाल्गुन ३ शनिबार
उदयपुर, फागुन ३
यसवर्षको ‘स्थानीयतह क्षमता स्वमूल्याङ्कन (लिजा)’मा १ नं. प्रदेशमा उदयपुर उत्कृष्ट भएको छ । सङ्घीय मामिला मन्त्रालयले वर्षेनी गर्दै आएको लिजाको भर्खरै सार्वजनिक परिणाम अनुसार आर्थिकवर्ष ०८०÷८१ को लिजामा ९२.४२ प्रतिशत अङ्क ल्याउँदै प्रदेशका १४ जिल्लामध्ये उदयपुर उत्कृष्ट ठहरिएको हो ।
उदयपुरलाई पछ्याउँदै खोटाङ दोस्रो भएको छ भने भोजपुर, सोलुखुम्बु र तेरथुमले क्रमशः तेस्रो, चौथो र पाँचौ स्थान लिदा सबभन्दा कम ५९ प्रतिशत पाएर ताप्लेजुङ अन्तिम सूचीमा परेको छ ।
मन्त्रालयको विवरण अनुसार उदयपुरको समग्र स्थिति ९४.०५ प्रतिशत छ भने प्रकृतियागत र परिमाणात्मक स्थिति क्रमशः ८८.७३ र ९४.४४ प्रतिशत अङ्क हासिल गरेको छ ।
स्थानीयतहमा रौतामाई उत्कृष्ट
उदयपुरभित्रका स्थानीयतहमध्ये रौतामाई गाउँपालिका सबभन्दा बढी अङ्क पाएर जिल्लाको उत्कृष्ट स्थानीयतह भएको छ । रौतामाईले ९५.७५ प्रतिशत ल्याउँदा दोस्रो हुने कटारी नगरपालिकाले ९४.७५ प्रतिशत पाएको छ । बेलका नगरपालिकालाई ८१.२७ प्रतिशत अङ्क मिलेको छ । यद्यपी उदयपुरका ८ मध्ये ५ स्थानीयतहको नतिजा भने सार्वजनिक भएको छैन । ४ नगर र ४ गाउँ गरी ८ वटा स्थानीयतह रहेको उदयपुरका सदरमुकामसमेत रहेको त्रियुगा नगर, चौदण्डीगढी नगर तथा ताप्ली, लिमचुङबुङ र उदयपुरगढी गाउँपालिकाको नतिजा वेबसाईटमा छैन ।
जिल्ला समन्वय समिति उदयपुरले आवश्यक कागजात नपुगेर वा तथ्याङ्क प्रविष्ट नभएर नतिजा नदेखिएको हुनसक्ने जनाएको छ । जिल्ला समन्वय अधिकारी गजेन्द्रनाथ शर्माले केही प्राविधिक त्रुटीले वेबसाईटमा नदेखिएको हुनसक्ने बताए । ‘आवश्यक कागजात नपुगेर हो वा तथ्याङ्क प्रविष्ट नभएर नदेखिएको होला’ जिसअ शर्माले भने ‘मन्त्रालय, जिल्ला समन्वय र स्थानीय ३ वटामध्ये कुनै एउटाको कमजोरीले पनि नतिजा सर्भरमा देखिदैन ।’
