१ महिना अघि
२0८१ फाल्गुन २ शुक्रबार
उदयपुर, फागुन २
मध्येवर्ती भेग उदयपुृुरको मुर्कुचीदेखि १५ मिनटमै रौतापोखरी जोड्ने छोटो दूरीको सडक निर्माण कार्य धमाधम भईरहेको छ । रौतामाई गाउँपालिका ७ को मुर्कुची बजारदेखि रौतामाई ६ मा पर्ने जिल्लाको प्रख्यात धार्मिक तथा पर्यटकीयस्थल रौतापोखरी जोड्ने सो सडक आधाभन्दा बढी निर्माण भईसकेको छ ।
कालोपत्रेसहित स्तरोन्नतिको सडकका लागि कच्ची ट्र्याक सकेर मोड सुधार, नाला निर्माण र रिटेरिङ वालको काम धमाधम भईरहेको रौतामाई ७ का वडाध्यक्ष मनोज रानामगरले बताए । उनका अनुसार मुर्कुर्चीदेखि पुँवारे हुँदै रौतापोखरी जोडिने सो नयाँ सडक बनेपछि १ नं. प्रदेशकै महत्वपूर्ण धार्मिक र पर्यटकीयस्थल रौतापोखरी पुग्न चारैतिरबाट नाका खुल्नेछ ।
रौता पोखरीलाई पर्यटकीय केन्द्रको रुपमा विकास गर्दै बढीभन्दा बढी आगन्तुक भित्र्याउने उदेश्यले सो छोटो मार्ग निर्माण गर्न तत्कालीन प्रतिनिधिसभा सदस्य तथा नेकपा माओबादी केन्द्रका नेता सुरेश राई (हिमाल)ले पहल गरेका थिए । साँसद राईले तत्कालीन सरकारको ‘संघीय रणनीतिक सडक योजना’ अन्तर्गत सो सडक योजना स्वीकृत गराएका थिए ।
सो सडक सदरमुकाम गाईघाटलगायत जिल्लाका दक्षिण, पश्चिम र पूर्वीभेगका सबै स्थानीयतह तथा छिमेकी तराईभेगका जिल्लाहरु सप्तरी, सिराहा, धनुषा, सर्लाही, महोत्तरी जनकपुर मोरङ, सुनसरी, झापालगायतबाट रौतापोखरी पुग्ने सबभन्दा छोटो दूरीकोे सडक हुने वडाध्यक्ष मगर बताउँछन् ।
मुर्कुची बजारदेखि रौतापोखरीसम्म जोड्ने बहुवर्षीय योजनाको सो सडकमा पहिलो वर्ष ०८०–८१ मा २५ करोड ६५ लाख १२ हजार १ सय ३५ रुपैंयाको ठेक्का लागेर काम भईरहेको रौतामाई गाउँपालिका अध्यक्ष वीरेन्द्र मगरले बताएका छन् । उनका अनुसार गतवर्ष असारमै ठेक्का लागेर निर्माण भईरहेको सडक मुर्कुचीदेखि तेलतेले हुँदै चौकी भन्ज्याङसम्म ७.५ किलोमिटर लामो छ । चौडाई १० मिटरसहित ८ मिटर कालोपत्रे हुने प्राविधिक इस्टीमेट रहेको सडकको निर्माण गर्ने जिम्मा लामा÷अजय÷शम्भु जेवीले पाएको छ ।
२ वर्ष ३ महिनाभित्र काम सकेर हस्तान्तरण गर्नुपर्ने सडकको काम ०७९ असार २९ गते सम्झौता भए पनि साउनदेखि मात्र काम भईरहेको छ । निर्माण कम्पनी प्रतिनिधि अजय राउतका अनुसार सडकको कालोपत्रे गुणस्तरीय अस्फाल्ट प्रबिधिको हुने र सम्झौता अवधिभित्रै निर्माण भईसक्ने गरी काम भईरहेको छ ।
