१ महिना अघि
२0८१ फाल्गुन १ बिहीबारकटारी, फागुन १
नेकपा (माओवादी केन्द्र) कटारीले जनयुद्ध दिवसको अवसरमा विहीबार साँझ दिप प्रज्वल गरेको छ । कटारीको गोल पार्कमा दीप प्रज्वलन गर्दै पार्टीले जनयुद्ध दिवस मनाएको हो।
कार्यक्रममा पार्टीका वैकल्पिक केन्द्रीय सदस्य केपी बरालले जनयुद्धले स्थापित गरेका मूल्य, मान्यता र सिद्धान्तलाई वर्तमान परिस्थितिमा आत्मसात् गर्दै अघि बढ्नुपर्ने बताए । जनयुद्धका सहिदहरूको योगदानको स्मरण गर्दै जनताको हकहितका लागि माओवादी केन्द्र सधैं प्रतिबद्ध रहेको र रहिरनने पनि बरालले बताए।
पार्टी नेता, कार्यकर्ता तथा विद्यार्थीहरूको सहभागितामा आयोजित कार्यक्रममा जनयुद्धको योगदान, उपलब्धि र वर्तमान राजनीतिक परिवेशबारे छलफल भएको थियो । दिवसमा प्राकृतिक स्रोत व्यवस्थापन कलेज कटारीका विद्यार्थी, स्थानीय बुद्धिजीवी तथा सर्वसाधारणको उपस्थिति थियो।
सहभागीहरूले जनयुद्धको ऐतिहासिक पक्षबारे चर्चा गर्दै वर्तमान राजनीतिक परिवेशमा माओवादी आन्दोलनको आवश्यकता र भूमिकाबारे कुरा राखेका थिए। यता त्रियुगा नगरपालिका ६ जलजले, ताप्ली, लिमचुङबुङ र बेलका तथा चौदण्डीगढीमा पनि दिप प्रज्वलनसहित विभिन्न कार्यक्रम गरी जनयुद्ध दिवस धुमधामसँग मनाइएको छ ।