१ महिना अघि
२0८१ फाल्गुन १ बिहीबार
उदयपुर, फागुन १
गतवर्ष सँस्थागत क्षमता स्वमूल्याङ्कन (लिजा) र वित्तीय सुशासन जोखिम मूल्याङ्कन (एफआरए)मा उत्कृष्ट अङ्क प्राप्त गरेको कटारी नगरपालिका सम्मानित भएको छ । बिहीबार सम्पन्न जिल्ला समन्वय समितिको सातौ जिल्ला सभामा कटारी सम्मानित भएको हो ।
जिल्ला समन्वय प्रमुख गौरबहादुर विश्वकर्माले कटारी नगरप्रमुख राजेशचन्द्र श्रेष्ठलाई सम्मानपत्र प्रदान गर्दै सम्मान गरेका हुन् । सङ्घीय मामिला तथा सामान्य प्रशासन मन्त्रालयले गरेको आर्थिकवर्ष ०७९÷८० को नतिजामा कटारीले लिजातर्फ ९३.२५ अङ्क र एफआरएमा ८३ ल्याएर जिल्लाको उत्कृष्ट सावित भएको थियो ।
कटारी लिजा र एफआरए दुवैमा जिल्लाका ८ स्थानीयतहमध्ये उत्कृष्ट भएको थियो भने प्रदेशका १ सय ३७ स्थानीयतहमध्ये दोस्रो भएको भन्दै सम्मान गरिएको समन्वय प्रमुख विश्वकर्माले बताए । सङ्घीय मामिला मन्त्रालयले स्थानीयतहहरुको आर्थिक कार्यप्रणाली र प्रशासनिक कामकारबाहीमा एकरूपता ल्याउन तथा पारदर्शिता र जवाफदेहिता प्रवर्द्धन गर्न लिजा र एफआरए विधि अपनाउदै आएको छ ।
सभाले चालुवर्ष २०८१÷०८२ को नीति तथा कार्यक्रमको संशोधित बजेट तथा विनियोजन ऐन सर्वसम्मत रूपमा पारित गरेको छ । जस अनुसार चालुवर्षका लागि विनियोजित १ करोड ४३ लाख २८ हजार मध्ये हालसम्म १ करोड २६ लाख ४६ हजार ९ सय ७० रुपैयाँ अर्थात ८८.२७ प्रतिशत खर्च भएको विवरण सभामा सुनाइयो ।
त्यसैगरी साविक जिल्ला विकास समितिको कोषबाट हाल परिवर्तित जिल्ला समन्वय समितिमा अल्या भई आएको बिबिध खर्च खाताको २ करोड ९९ लाख ४२ हजार ४ सय ७३ रुपैँया ७५ पैँसामध्ये ४५ लाख ६० हजार ४ सय ५७ रुपैँया ८२ पैँसा खर्च भएको जनकारी दिइयो । अव सो खातामा २ करोड ३० लाख ७२ हजार १५ रुपैँया ९३ पैँसा मौज्दात रहेको पनि जनाइएको छ ।
