त्रियुगा १६ मा ४ कृषि सडक निर्माण सुरु 

१ महिना अघि

अम्बोके, फागुन १

त्रियुगा नगरपालिका १६ नं. वडामा एकैचोटी ४ वटा कृषि सडक निर्माण सुरु भएको छ । नगरपालिकाको चालु आर्थिकवर्षको ‘प्रधानमन्त्री रोजगार कार्यक्रम’अन्तर्गत १६ नं. वडाका विभिन्न ठाउँलाई जोड्ने ४ कृषि सडकको निर्माण सुरु भएको हो । 

बुधबार अमबेकेस्सिथ एक कार्यक्रममा १६ नं. को कुसुमटार–धौरी, बरुवा खोला–अकर सिम्ले, भोर्ले–सिँदाली र डिहीटार–अम्वोके–सिद्रे–डहर खोल्सी कृषि सडक निर्माण कार्यको शुभारमभ भएको हो । नगरपालिकाकी प्रधानमन्त्री रोजगार कार्यक्रम संयोजक पम्फा घले (निशा)का अनुसार ४ वटै कृषि सडकको औपचारिक सुरुवात भएको हो । संयोजक घलेसँगै १६ नं. वडाध्यक्ष मानबहादुर राई, ११ र ८ नंं. वडाध्यक्षद्वय सुमन्त कोईराला र राजकुमार राउत तथा नगर अधिकृतद्वय विश्वजीत राई र एकबहादुर राउतले सडक निर्माणको शुभारम्भ गरे । 

सो अवसरमा उनीहरुले कामदार श्रमिकहरुलाई परिचयपत्र, मजदुर पोशाक तथा कार्य उपकरण प्रदान गरे । सो अवसरमा इञ्जिनियर रमेश ढुङ्गाना, जिन्सी शाखा प्रमुख रोनिशा खतिवडा, वडाध्यक्ष राईलगायतले श्रमिक मजदुरलाई अभिमुखीकरण तालिम दिदै सडक निर्माण कार्यमा गुणस्तरीय कच्चा पदार्थको प्रयोग गर्नुपर्ने विषयमा सचेत गराए । 

वडाध्यक्ष मानबहादुर राईका अनुसार कृषि सडक बनाउन २४ लाख ७१ हजार २ सय रुपैँयामा निर्माण गर्न लागिएको हो । जसका लागि प्रधानमन्त्री रोजगार कार्यक्रममार्फत २२ लाख ७१ हजार २ सय रुपैँया निकासा भएको छ भने वडा कार्यालयले सहभागितावापत २ लाख रुपैँया विनियोजन गरेको छ । श्रमिकहरुले १ सय दिनमा सडक निर्माण सम्पन्न गर्नुपर्ने प्रावधान रोजगार कार्यक्रमले तोकेको वडाध्यक्ष राईले बताए । 

श्रमको सम्मान गर्दा देशको विकास छिटो हुने कुरा यो कार्यक्रमले प्रमाणित गर्ने उनले बताए । यो कार्यक्रमले गाउँमै रोजगारी सृजना गरेर स्थानीय श्रमिकको सिप र क्षमताको उपयोग गर्दै श्रमको सम्मान र ठोस काम हुने वडाध्यक्ष राईको भनाई छ । काम र रोजगारीले गरिवी, बेरोजगारी र पछाउटेपनको समस्या हट्ने पनि वडाध्यक्ष राईले बताए ।

संयोजक घलेका अनुसार प्रधानमन्त्री रोजगार कार्यक्रममार्फत सानो लगानीमा ठूला योजनाहरु सञ्चालन गर्न सहज भएको छ । रोजगार कार्यक्रम अन्तर्गत सङ्घीय सरकारले सय दिन काम गरेर सम्पन्न गर्नसक्ने योजनाहरु छनौट गर्ने गरेको छ भने त्यसमा वडा कार्याललाई अनिवार्य सहभागितावापत बजेट छुट्याउनुपर्ने प्रावधान राखेको उनको भनाई छ । सडक, सिँचाई, नाला, खानेपानी, भवन र सिँढीजस्ता योजनाहरु रोजगार कार्यक्रममार्फत बनाउदा सजिलै र ठोस रुपमा हुने गरेको अनुभव घलेले सुनाईन् । 

प्रधानमन्त्री रोजगार कार्यक्रम सञ्चालन गर्ने ठाउँ थुप्रै बाँकी रहेको र रोजगारी माग्ने पनि धेरै रहेको उनले बताईन् । नगरले हरेक वर्ष यस कार्यक्रमका लागि श्रमिक कामदा आव्हान गर्ने गरेको छ । जसमा निवेदन दिनेमध्ये निश्चित सङ्ख्याले मात्र रोजगारी पाउँने व्यवस्था छ । काममा छनौटमा पर्ने श्रमिकहरुले ३ सय ६५ दिन नै रोजगारी पाउनुपर्ने माग गर्ने गरेको भए पनि सरकारको नीति अनुसार यो कार्यक्रममा सय दिन मात्र रोजगारी पाउने व्यवस्था छ । 

सानो लगानीमा गाउँको विकास हुनुका साथै स्थानीयले गाउँमै सिप र क्षमता अनुसार श्रम गरेर जिविकोपार्जन गर्न पाउने भएकाले पनि यो कार्यक्रम लोकप्रिय हुदै गएको छ । यो कार्यक्रम प्रभावकारी र उपलब्धीमूलक हुने सावित भईसकेकाले यसले रोजगारीको व्यवस्थापनसँगै गाउँ टोलको विकासमा पनि महत्वपूर्ण भूमिका खेल्ने घले बताउँछिन् ।