१ महिना अघि
२0८१ फाल्गुन १ बिहीबार
काठमाडौं, फागुन १
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनयुद्धलाई राष्ट्रिय दिवसको मान्यता दिलाएर छाड्ने बताएका छन् । ३० औँ जनयुद्ध दिवसको अवसरमा पार्टी केन्द्रीय कार्यालय पेरिसडाँडामा आयोजित कार्यक्रममा अध्यक्ष प्रचण्डले जनयुद्धको प्रेरणा सयौं वर्षसम्म रहिरहने र यसलाई राष्ट्रिय दिवसको रुपमा स्थापित गराउने प्रतिबद्धता जनाए ।
जनयुद्ध नेपालको इतिहासमा सबैभन्दा ठूलो युगान्तकारी परिवर्तन गराउने परिघटना भएको भन्दै उनले जनयुद्ध आज मात्र होइन, सयौं वर्षसम्म पनि प्रेरणा दिइरहने बताए । यसलाई कसैले मेटाउन संभव नभएको भन्दै उनले जसले मेटाउने प्रयास गर्छ, उm आफै खरानी हुने बताए । अध्यक्ष प्रचण्डले अहिले शान्ति प्रक्रिया नटुङ्गिएको कारण देखाएर अदालतले स्थगन गरे पनि यसलाई राष्ट्रिय दिवसको रुपमा स्थापित गरेरै छाड्ने दृढता व्यक्त गरे ।
आफु अहिले सङ्घीय लोकतान्त्रिक गणतन्त्रअन्तर्गत सुशासन, सामाजिक न्याय र समृद्धिको अभियानमा रहेको भन्दै उनले यसको मुख्य प्रेरणा जनयुद्ध नै भएको बताए ‘हामी जनयुद्ध र जनआन्दोलनबाट प्राप्त उपलब्धिलाई रक्षा र विकास गरेर संघीय लोकतान्त्रिक गणतन्त्र हुँदै समाजवादको आधार तयार गर्ने यात्रामा छौं ।’
जनयुद्ध र जनआन्दोलनको बलमा बनेको संविधानका स्थापित मान्यतालाई एकथरीले अस्वीकार गर्ने र जनताका अधिकार कुण्ठित गर्ने प्रयास गरिरहेको उल्लेख गर्दै उनले यी सबै प्रयास असफल पार्न आफूहरुले निरन्तर अग्रगमनका लागि सङ्घर्ष गरिरहेको बताए ।
अहिले पनि दुई वर्ग र प्रवृत्तिका बीच सङ्घर्ष चलिरहेको बताउँदै उनले धेरै वर्ष पहिले सङ्घीय लोकतान्त्रिक गणतन्त्रमा पुगे पनि प्रतिक्रियावादीहरुले जनताको गणतन्त्र हुन नदिने प्रयास गर्छन् भन्ने आँकलन आज पुष्टि भएको बताए । ‘एकथरि तत्व संविधानका अग्रगामी प्रावधान उल्ट्याउने प्रयासमा लागिरहेको छ तर, हामी यसलाई समाजवादी गणतन्त्रसम्म लैजान ती तत्वसँग सङ्घर्ष चलिरहेको छ’ उनले भने ।
विगतमाका कमीकमजोरीको आत्मसमीक्षा गर्दै पार्टीलाई हामी फेरि यो देशका आम श्रमजीवी वर्ग, महिला, दलित, आदिवासी जनजाति, मधेशी, मुश्लिम लगायत उत्पीडित समुदाय र क्षेत्रको एजेण्डामा फर्काएको उल्लेख गर्दै उनले पछिल्लो समय सरकारको नेतृत्व गर्दा सुशासन, सामाजिक न्याय र समृद्धिका पक्षमा गरिएको ऐतिहासिक थालनीलाई जनताले रुचाएको बताए ।
आफ्नो वर्ग र समुदायतर्फ फर्कदै जनताका एजेण्डालाई दृढतापूर्वक अघि बढाउने र जनतासँगको एकतालाई बलियो बनाउने सङ्कल्प गरेको उल्लेख गर्दै उनले यसले पनि जनतामा सकारात्मक प्रभाव पर्दै गएको बताए । अध्यक्ष प्रचण्डले जनयुद्धको तयारी, सञ्चालन, शान्ति प्रक्रिया, संविधान निर्माण र गणतन्त्र घोषणाको ऐतिहासिक नेतृत्व गर्ने अवसर पाउनु आफ्ना लागि गर्वको विषय भएको उल्लेख गरे ।
क्रान्तिकारी शक्तिलाई अझ बलियो बनाउन जनयुद्धका सहयात्रीलगायत सबै कम्युनिष्ट क्रान्तिकारीहरुलाई एकताको अपिल पनि उनले गरेका छन् । क्रान्तिकारी शक्तिलाई बलियो बनाए मात्रै प्रक्रियावादीका षड्यन्त्र बिफल बनाउने सकिने भन्दै उनले जनताले देखेको क्रान्तिको सपना पूरा गर्न सबै क्रान्तिकारी शक्तिहरु एकता र ध्रुवीकरणका लागि तयार हुन आव्हान गरे ।
प्रचण्डले जनताले प्रत्यक्ष देख्ने र भोग्ने गरी उनीहरुको जीवन बदल्न नसकेकोमा पछुताउँदै तलैदेखि समाजवादी क्रान्तिको जग कसरी बसाउन सकिन्छ भनेर नयाँ सङ्कल्प गर्ने बेला आएको बताए । जनताको घर आँगनमा उज्यालो ल्याउने सङ्कल्प आजको मुख्य कार्यभार बनेको भन्दै उनले भने ‘भर्खरै सम्पन्न केन्द्रीय समिति बैठकले त्यस दिशातिर पार्टीलाई अघि बढाएको हुनाले सबैलाई यो अभियानमा लाग्न अपिल गर्दछु ।’
