लिमचुङबुङ र ताप्लीले दिए ‘जनयुद्ध दिवस’मा सार्वजनिक विदा

१ महिना अघि

उदयपुर, माघ ३०

उदयपुरका लिमचुङबुङ र ताप्ली गाउँपालिकाले फागुन १ गते पर्ने ‘जनयुद्ध दिवस’मा सार्वजनिक विदा दिएका छन् । फागुन १ गते तत्कालीन नेकपा (माओबादी)ले सुरु गरेको जनयुद्धको स्मरण र बर्तमान राज्य व्यवस्थाको जग भएको दिनको सम्मानमा सार्वजनिक विदा दिने निर्णय गरेका हुन् । 

लिमचुङबुङका अध्यक्ष मेजरकुमार राई र उपाध्यक्ष पुष्पलाल राईद्वारा बुधबार दिउँसो संयुृक्त हस्ताक्ष्रमा जारी गरेको सूचनामा इतिहासको कालखण्डमा राजनीतिक आन्दोलनमार्फत जनताको त्याग, तपस्या र बलिदानबाट परिवर्तन आउने गरेको र अहिलेको सङघीयता र लोकतान्त्रिक गणतन्त्र ल्याउने दिनको शुभारम्भ भएको दिन फागुन १ गते जनयुद्ध दिवसलाई उत्सवको रुपमा मनाउन सँधा झै सार्वजनिक विदा दिइएको उल्लेख छ । फागुन १ गतेका दिन अत्यावश्यक कामबाहेक गाउँपालिकाभित्रका सबै सरकारी तथा अद्र्धसरकारी कार्यालयहरु बन्द रहने पनि सूचनामा उल्लेख छ ।

ताप्ली गाउँपालिकाले पनि सोही व्यहोराको सूचना जारी गर्दै जनयुद्ध दिवसको सार्वजनिक विदा दिएको जनाएको छ । ताप्लीका अध्यक्ष ढुङ्गराज विश्वकमाईद्वारा जारी सूचनामा अहिलेको सङ्घीयता र लोकतान्त्रिक गणतन्त्रको व्यवस्था ल्याउनमा जनयुद्धको महत्वपूर्ण भूमिका रहेको भन्दै त्यसका लागि बलिदानी दिने महान् सहिदहरुप्रति सम्मान गर्दै जनयुद्ध सुरु गरेको दिनको सम्झनामा सार्वजनिक विदा इिएको उल्लेख छ । 

यसअघि खोटाङका जन्तेढुङ्गा र खोटेहाङ गाउँपालिकाले मङ्गलबार दिउसो नै सूचना जारी गरी फागुन १ गतेलाई जनयुद्ध दिवस मनाउन सार्वजनिक विदा दिइएको सूचना जनाएका छन् । जन्तेढुङ्गा गाउँपालिका अध्यक्ष अरुणा राई (दीक्षा)ले जारी गरेको सूचनामा फागुन १ गते महान् जनयुद्ध सुरु भएको स्मरणमा सार्वजनिक विदा दिइएको बताएकी छिन् । ०५२ साल फागुन १ गते सुरु महान् जनयुद्धको स्मरण र त्यस क्रममा देशमा आमूल राजनीतिक परिवर्तनका खातीर आफ्नो अमूल्य जीवन उत्सर्ग गर्ने महान् सहिदहरुप्रति सम्मानार्थ सार्वजिनक विदा दिइएको उनको सूचना उल्लेख छ ।

‘नेपालमा सङ्घीय लोकतान्त्रिक गणतन्त्र स्थापनाका लागि ०५२ साल फागुन १ गतेदेखि सञ्चालित महान् जनयुद्धको स्मरण र महान् सहिदहरुप्रति उच्च सम्मानगर्न मितिः ०८१ फागुन १ गते जनयुद्ध दिवसका दिन गाउँपालिका अध्यक्षस्तरीय निर्णयानुसार गाउँपालिका अन्तर्गतका सम्पूर्ण वडाहरु, विद्यालययलगायत मातहतका सबै सरकारी कार्यालयमा १ दिन सार्वजनिक विदा दिइएको छ’ उनको सूचनामा उल्लेख छ ।

त्यसैगरी खोटेहाङ गाउँपालिका अध्यक्ष उदिमबहादुर राई (मुक्ति)ले पनि सोही व्यहोराको सूचना जारी गर्दै सार्वजनिक विदा दिएका छन् । जन्तेढुङ्गाकी अध्यक्ष दीक्षा र खोटेहाङका अध्यक्ष मुक्ति तत्कालीन नेकपा (माओबादी)ले गरेको सशस्त्र जनयुद्धमा संलग्न नेताहरु हुन् । 

माओबादीको ०५२–०६२ को १० वर्षे जनयुद्धलाई नेकपा (एमाले) र नेपाली काँग्रेसले जनयुद्ध भन्न रुचाईरहेका छैनन् । माओबादीले भने १० वर्षे जययुद्धकै जगमा देशमा सङ्घीयता, गणतन्त्र, धर्मनिरपेक्षता, समावेशी र समानुपातिक व्यवस्था प्राप्त भएको भन्दै त्यसलाई महत्व दिदै आएको छ । हरेक वर्ष फागुन १ गतेका दिन माओबादीले विविध रचनात्मक तथा राजनीतिक कार्यक्रमका साथ जनयुद्ध दिवस मनाउँदै आएको पनि छ ।

प्रचण्ड नेतृत्वको तत्कालीन सरकारले गतवर्ष फागुन १ गतेलाई ‘जनयुद्ध दिवस’ भन्दै राष्ट्रियरुपमा सार्वजनिक विदा नै दिएको थियो । तर, त्ससविरुद्ध एमाले र काँग्रेसलगायतले आधादर्जन मुद्धा दिएका थिए । ती मुद्धाउपर फैसला गर्दै सर्वोच्च अदालतले जनयुद्ध दिवसको विदा खारेज गरेको थियो ।