१ महिना अघि
२0८१ माघ २९ मंगलवार
बेलका, माघ २८
उदयपुरको बेलका नगरपालिकाका दर्जन महिलाको बच्चादानी (पाठेघर)को मुखमा क्यान्सरको जोखिम देखिएको छ । आईतबार र सोमबार आयोजित ‘निःशुल्क महिला स्वास्थ्य शिविर’मा स्वास्थ्य परीक्षण गर्ने महिलाहरुको बच्चादानीको मुखमा क्यान्सरको जोखिम देखिएको हो ।
महिला साना किसान कृषि सहकारी संस्था तपेश्वरीद्वारा आयोजित शिविरमा १ सय १८ जनाले बच्चादानीको स्वास्थ्य परीक्षण गराएका थिए । जसमध्ये ११ जनाको बच्चादानीको मुखमा क्यान्सरको उच्च जोखिम देखिएको पत्ता लागेको छ ।
परीक्षण गराउनेमध्ये ४२ जना महिलाको बच्चादानीको अवस्था अस्वस्थ देखिएकोमा उच्च जोखिममा रहेका ११ जना छन् । उनीहरुलाई अहिलेलाई थप उपचारका लागि परामर्श दिएर पठाइको छ भनेआङ खस्ने समस्या भएका ५ जनाको बच्चादानीको मुखमा रिङ पे्रसरी लगाइएको छ ।
शिविरमा ३ सय ५ महिलाले स्वास्थ्य परीक्षण गराएको आयोजक सँस्थाले जनाएको छ । स्त्री रोग विशेषज्ञ डा विद्या पोखरेल र जनरल सर्जन डा. प्रविणकुमार यादवको टोलीले शिविरमा स्वास्थ्य परीक्षण गराएको कार्यक्रम संयोजक राजीव बस्नेतले बताए ।
उनका अनुसार ग्रामीणक्षेत्रका महिलाहरूमा हुने बच्चादानीको समस्या तथा गुप्ताङ्गका रोगहरूको पहिचान गरी समयमै उपचार गराउने उदेश्यले शिविर आयोजना गरिएको हो । शिविरमा ४५ जनाले निःशूल्क प्रयोगशाला परीक्षण गराइएको थियो भने १ सय ४२ जनालाई निःशूल्क औषधि प्रदान गरिएको छ ।
शिविरको उद्घाटन गर्दै बेलका नगर उपप्रमुख जिरा राईले स्थानीयस्तरमै महिला स्वास्थ्य सेवाको पहुँच पुर्याएकोमा आयोजक सहकारी सँस्था र पदाधिकारीलाई धन्यबाद दिईन् । उनले यस्ता रचनात्मक र सृजनसिल कार्यक्रमलाई निरन्तरता दिदै जान आग्रह गर्दै यसका लागि नगरपालिकाले सक्दो सहयोग गर्ने प्रतिबद्धता पनि जनाईन् ।
