६ महिनामा ताप्लीको पुँजीगत बजेट साढे २३ प्रतिशत

१ महिना अघि

उदयपुर, माघ २८

विकास निर्माणको काम अर्थात पुँजीगत बजेट सालतमामीको अन्त्यमा खर्च गर्ने परम्पराले माथिल्लो निकायदेखि स्थानीयतहसम्मलाई छाडेको छैन । हरेक वर्ष विनियोजित पुँजीगत बजेट आर्थिकवर्ष सकिनै लाग्दा मात्र खर्च गर्ने दशकौअघिको प्रचलन अझै कायम छ । यही कारण आार्थिक वर्ष सुरु भएको ७ महिना बित्न लाग्दासम्म पुँजीगत खर्च प्रतिशत टिठलाग्दो अवस्थामा छ । 

उदयपुरका ८ स्थानीयतहदेखि प्रदेश र सङ्घीय कार्यालयहरुसमेतको पुँजीगत बजेट खर्च बिम्व मिल्दोजुल्दो छ । जसमा स्थानीयतहहरुको अवस्था झन् दयनीय छ । चालुतर्फको बजेट खर्च सन्तोषजनक गरे पनि स्थानीयतहहरुले पुँजीगततर्फको खर्च हिस्सा ३० प्रतिशतसम्म पु¥याउँन पनि मुस्किल भएको देखिन्छ । केही स्थानीयतहले २० प्रतिशत कटाउँदा कतिपयको त १० प्रतिशतसम्म पनि हुन सकिरहेको छैन ।

उदयपुरको ताप्ली गाउँपालिकाले ६ महिना अवधिमा समग्र बजेट साढे २४ प्रतिशत हाराहारी खर्च गरिरहेको छ । साउनदेखि पुस मसान्तसम्म ताप्लीको चालुतर्फको खर्च २३.४९ प्रतिशत र पुँजीगत बजेट २१.८९ प्रतिशतमै सीमित रहेको छ । 

प्रमुख प्रशासकीय अधिकृत भक्तबहादुर राईका अनुसार चालु आर्थिकवर्षका लागि ताप्ली गाउँसभाले ४० करोड ७९ लाख ३ हजार २ सय १२ रुपैँयाको बजेट प्रक्षेपण गरेको छ । जसमा पुँजीगततर्फ ३० करोड २८ लाख ९८ हजार ७ सय ६५ र चालुतर्फ १० करोड ५० लाख ४ हजार ४ सय ४७ रुपैँया रहेको छ । 

जसमा पुँजीगततर्फको बजेट पुस मसान्तसम्म ६ करोड ६२ लाख ९१ हजार ५ सय ९८ रुपैँया मात्र खर्च भईरहेको हाकिम राईले बताए । चालु खर्च भने ताप्लीको २ करोड ९५ लाख ९ हजार ७ सय ५५ अर्थात २८.१० प्रतिशत भएको छ । पुँजीगत र चालु गरी समग्र बजेट खर्च भने ताप्लीले पुस मसान्तसम्ममा ९ करोड ५८ लाख १ हजार ३ सय ५३ रुपँैया अर्थात साढे २३ प्रतिशत पुगेको हाकिम राईले बताए । 

गाउँपालिका अध्यक्ष ढुङ्गराज विश्वकर्माले पुँजीगत रकम भौतिक पूर्वाधार निर्माणमा खर्च गर्नुपर्ने तर, बिकट पहाडी भेग, सडक बाटोको दुरावस्थाले काम छिटो गर्न समस्या भएर  खर्च प्रतिशत कम भएको बताए । उनका अनुसार भौगोलिक कठिनाईका कारण ताप्लीमा भौतिक संरचना निर्माणमा चाहिने कच्चा पदार्थको उपलब्धतामा समस्याले पनि काम ढिला भएर खर्च कम देखिएको हो । 

‘भवन, खानेपानी, सडक, सिँचाईजस्ता योजना निर्माणमा ढुङ्गा, गिटी, बालुवा टाढाबाट ल्याउनुपर्छ, सिमेन्ट, रड, जस्तापाता र किला काँटीजस्ता फलामजन्य सामग्री सहर बजारको भर पर्नुपर्छ’ अध्यक्ष विश्वकर्माले भने ‘त्यसका लागि सडक बाटो राम्रो नहुनुले पनि उत्तिकै समय जान्छ, त्यसैले पुँजीगत खर्च ढिला हुन जाने हो ।’

ताप्लीमा करोडौँको लिफ्टिङ खानेपानी योजना निर्माणाधीन अवस्थामा छ भने वडा भवन, स्वस्थ्यचौकी, सामुदायिक र विद्युत विस्तारजस्ता विकासे योजनाहरुको काम भईरहेको छ । कोही वहुवर्षीय क्रमागत योजनाहरु पनि थुप्रै सञ्चालनमा छन् भने कोही आर्थिकवर्षको अन्त्यमा सम्पन्न गरिने संरचनाहरु प्नि थुप्रै निर्माण भईरहेको अध्यक्ष विश्वकमाले बताए । 

लेखापाल टीकाराम रहपालले भने पुँजीगत बजेट खर्च देखिएकोभन्दा बढी नै भएको दावी गरेका छन् । योजना निर्माणको काम भएकाले भुक्तानीको रकम मात्र खर्च देखिए पनि रनिङ बील र भुक्तानीको पाईपलाईनमा रहेका योजनाहरुसमेत जोड्ने हो भने खर्च प्रतिशत झण्डै दोब्बर हुने लेखापाल रहपालले बताए ।