तावा र मरुवामा पक्की पुल बन्दै

१ महिना अघि

कटारी, माघ २८

कटारी नगरपालिकाका दुईवटा खोलामा मोटरेबल पक्की पुल निर्माण हुने भएको छ । प्रदेश सरकारको लगानीमा कटारी ४ स्थित मरुवा खोला र ५ को तावा खोलामा पक्की पुल बनाउन लागिएको हो ।
 

मरुवा खोला कटारी ४ को जहडी–तित्रीबोट जोड्ने नगरपालिकाकै सबभन्दा पुरानो सडक खण्डमा पर्ने खोला हो । त्यहाँ पुल निर्माण गर्न प्रदेश सरकारले ११ करोड लाग्ने डिपिआर (विस्तृत परियोजना प्रतिबेदन) तयार गरेको छ । सो सडक खण्डमा पक्की पुल नहुँदा वर्षायाममा स्थानीयलाई आउजाउ गर्न प्रायः ठप्प हुने गरेको छ । चुरे जङ्गल शीर रहेको खोलामा सामान्य वर्षा हुँदा पनि बाढी उर्लने हुँदा घाँसदाउरा र विद्यालय आउजाउ गर्नसम्म स्थानीयलाई कठिनाई हुदै आएको छ । 

त्यस्तै ५ नं. वडाको तीनतलेदेखि ६ नं. को चुहाडबीचको तावा खोलामा पुल बनाउन १७ करोड चाहिने डिपिआर तय भएको प्रदेश सरकार, भौतिक पूर्वाधार विकास मन्त्रालयले जनाएको छ । पुल निर्माण र रेखदेख तथा सुपरिवेक्षण गर्ने काम पूर्वाधार विकास कार्यालय उदयपुरले गर्नेगरी दुवै खोलामा यसैवर्ष काम थाल्न लागेको छ । 

पूर्वाधार विकास कार्यालयका प्रमुख (डिई) ललितकुमार चौधरीका अनुसार मरुवा र तावा दुवै खोलामा पुल बनाउन प्राविधिक र कानुनी प्रक्रिया चलिरहेको छ । प्रदेश सरकारले पहिला नै पुलको डिपिआर तयार गरी लागत इस्टीमेटसमेत बनाईसकेको र वातावरणीय प्रभाव मूल्याङ्कन (आईईई) सकेर प्रतिवेदन तयार गर्ने क्रम चलिरहेको डिई चौधरीले बताएका छन् । प्रतिबेदन स्वीकृत भएपछि टेण्डरको प्रक्रिया अघि बढाएर निर्माण कार्यको थाली हुने उनको भनाई छ । 

सो क्षेत्रबाट प्रदेशसभामा निर्वाचित तथा पूर्व उद्योग, कृषि तथा सहकारीमन्त्री रामकुमार खत्रीले दुवै पुल बनाउन आवश्यक बजेट व्यवस्था गरेको बताएका छन् । नगरपालिका भएर पनि कटारीको सबभन्दा पुरानो नाका सडकमै पुल नहुँदा हरेक वर्षायाममा स्थानीयलाई कठिनाई भएकाले यसैवर्ष पुल निर्माण गर्न मन्त्री भएका बेला बजेट तर्जुमा गर्न लगाएको साँसद खत्रीले बताए । 

कटारी ४ का वडाध्यक्ष भूपेन्द्रसिंह तामाङका अनुसार जहडी–तित्रिबोट–गबुवा खण्डको सडक कटारी बजारदेखि छिमेकी उदयपुरगढी गाउँपालिका हुँदै पहाडी भेग जा्ड्ने पुरानो नाका सडक हो । बाक्लो आउजाउ हुने सो सडकमा पर्ने मरुवामा पुल अभावमा स्थानीयहरु कोही विरामी परे एम्बुलेन्ससम्म तर्न नसक्दा अकालमा ज्यान गुमाउनुपर्ने अवस्था छ । त्यस्तै माथिल्लो भेगबाट कटारी आउजाउ गर्ने विद्यार्थी, व्यापारी र सर्वसाधारण उपभोक्तालाई पनि हरेक वर्षायाममा बाढीको कहर खेप्नुपर्ने बाध्यता पुल बनेपछि हट्ने वडाध्यक्ष तामाङले बताए । 

त्यसैगरी तीनतले–चुहाड जोड्ने तावा खोलामा पुल नहुदा कटारी आउजाउ गर्न घुमाउरो बाटो हिड्नुपर्ने समस्या छ । त्यहाँ पुल बनेपछि चुहाडबासीलाई नगरपालिका केन्द्र कटारी बजार पुग्न आधाभन्दा बढी छोटो दूरी र समय खर्चदा हुने कटारी ६ का वडाध्यक्ष प्रेमबहादुर मगरले बताए । 
ती दुवै खोलामा पक्की पुल बनाउन स्थानीयले वर्षौँदेखि माग गर्दै आए पनि सरकारले बेवास्ता गर्दै आएको गुनासो अव सुन्नु नपर्ने भएको छ । दुवै खोलामा पक्की पुल निर्माण हुने हल्लाले वडाबासी खुसी भएका छन् ।