१ महिना अघि
२0८१ माघ २६ शनिबार
सुकौरा, पुस २६
त्रियुगा नगरपालिका १६ नं. वडाले आयोजना गरेको ‘निशूल्क स्वास्थ्य शिविर’मा अधिकतर महिलासहित १ सय ५९ जनाले फाईदा लिएका छन् । बृद्धबृद्धा, अशक्त र अपाङ्गता भएका वडाबासीलाई सहज बनाउने गरी शुक्रबार आयोजित शिविरमा १ सय ८ महिला र ५१ जना पुरुष लाभान्वित भएको वडा कार्यालयले जनाएको छ ।
वडा सचिव महेश खनालका अनुसार यसअघिका वर्षहरुदेखि नै सञ्चालन हुँदै आएको शिविरलाई वडाले निरन्तरता दिएको हो । वडागत स्वीकृत बजेट अनुसार शिविर आयोजना गरिएको उनले बताए । वडाबासीको स्वास्थ्यप्रति सचेत हँुदै हरेक वर्ष जाडोयाममा शिविर सञ्चालन गर्ने गरिएको छ । जाडोमा बृद्धबृद्धा, दीर्घरोगी र अशक्तलाई पर्ने स्वास्थ्य समस्यालाई ध्यानमा राखेर वडाले वर्षेनी शिविर चलाउँदै आएको खनालले बताए ।
वडाध्यक्ष मानवाहादुर राईले गाउँमै स्वस्थ्य शिविर राख्दा सानोतिनो रोगका लागि वडाबासीलाई सदरमुकाम र बजारका अस्पताल धाईराख्नु नपर्ने बतँए । वडाध्यक्ष राईका अनुसार सामान्य विरामी हुँदा पनि चेकजाँच गराउन गाईघाट जानुपर्दा समय र पैसा दुवै खर्च हुने हुँदा गाउँघरमै सेवा दिन शिविर चलाइको हो ।
शिविरले वडाबासी बृद्धबृद्धा, महिला तथा अपाङ्गता व्यक्ति र अशक्तहरुलाई विशेष सहयोग पुग्ने गरेको उनले बताए । मधुमेह (सुगर), रक्तचाप (प्रेसर), रगत, दिसापिसाव, दम, मुटु (इसिजी)लगायत जेनेरल ओपिडीसँगै भिडियो एक्सरे, ल्याव टेष्ट र आवश्यक औषधिसमेत शिविरमा निशूल्क वितरण गरिएको थियो ।
नगर स्वास्थ्य शाखाको सहयोग र सोम लाईफ केयर एण्ड डाईनोष्टिक प्रालिको प्राविधिक टोलीले शिविरमा सहयोग गरेको थियो । शिविर आगामी दिनमा पनि थप सेवा विस्तार गर्दै निरन्तर चलाउँदै लाने योजना वडाले बनाएको छ ।
