सलेशले चुम्यो नारद मुनि गोल्डकप

२ महिना अघि

बसाहा, माघ २२

चौदण्डीगढी नगरपालिका ४ बसाहामा मङ्गलबार सम्पन्न ‘१० औँ नारद मुनि थुलुङ राई स्मृति गोल्डकप प्रतियोगिता ०८१’को उपाधि सलेश फुटबल क्लब सिराहाले चुमेको छ । मङ्गलबार भएको फाईनल खेलमा २–१ गोल अन्तरले झापा ११ लाई पराजित गदै सलेश उपाधि चुम्न सफल भएको हो । 

खेल सुरु भएको ३४ औँ मिनटमा सलेशका १७ नं. खेलाडी मिलन राईले पहिलो गोल गर्दै टिमलाई अघि बढाएका थिए । २ मिनटपछि नै ३६ औँ मिनटमै पेनाल्टी सुटआउटको मौका पाएका उनै मिलनले दोस्रो गोल गर्न सफल भए । 

लगातार विपक्षीबाट २ गोल भएपछि आयोजकले मध्यान्तरअघिको समय ५ मिनट थपिदियो । तर, सो समयको पनि उपयोग गर्न नसकेको झापा मध्यान्तरपछि भने निकै आक्रामक रुपमा प्रस्तुत भयो । पटकौँको प्रयासम झापाका खेलाडी राजेश दाहालले ३६ औँ मिनटमा १ गोल फर्काउन सफल भए । ३ नं. जर्सीका खेलाडी निशान बस्नेतले रातो कार्ड देख्दै मैदान छाड्नु पर्यो भने अर्का खेलाडीले पहेँलो कार्डको सामना गर्नुपर्दासम्म पनि थप गोल गर्न नसक्दा झापा उपविजेतामै सीमित हुनु प¥यो । 

विजयी सलेशलाई १ नं. प्रदेश सरकारका सामाजिक विकासमन्त्री पाँचकर्ण राई र अग्रज सङ्गीतकार बुलु मुकारुङले गोल्डकप, नगद ५ लाख र प्रमाणपत्र प्रदान गरे । त्यस्तै  र चौदण्डीगढी नगरप्रमुख कालुमान लामाले उपविजेता झापा ११ लाई नगद २ लाख ५० हजार, ट्रफी र प्रमाणपत्र प्रदान गरे । 

विधागत पुरस्कार  पाउनेहरुमा उत्कृष्ट गोलरक्षक सलेशका विशाल सुनार, उत्कृष्ट डिफेन्डर झापाका सुमन मगर, बेस्ट मिडफिल्डर झापाकै निकेश श्रेष्ठ घोषित हुँदा उदीयमान खेलाडी आयोजक बसाहाका दिपेश तामाङ घोषित भए । बेस्ट प्लेयर अफ द टुर्नामेन्टको उपाधि सलेशकै अमन लामा भए भने खेल अवधिभरको म्यान अफ द म्याच र हाई स्कोररको उपाधि सलेशका मिलन राई भए । विधागत खेलाडीहरु सबैलाई नगद, ट्रफी र प्रमाणपत्र प्रदान गरियो । 

आयोजक अध्यक्ष गौतम राईका अनुसार बसाहा गोल्डकप उदयपुरकै पहिलो र सबभन्दा ठूलो पुरस्कार राशीको प्रतियोगिता हो । गत असोज १७ गतेदेखि गर्ने तय भएकोमा विविध कारणले ४ महिना धकेलिएर अहिले प्रतियोगिता आयोजना गरिएको हो । 

बसाहा गोल्डकप जहानीया राणा शासनविरुद्धको २००७ सालको क्रान्ति योद्धा नारद मुनि थुलुङ राईको स्मृतिमा बसाहा क्लबले डेढदशकयता वर्षेनी आयोजना गर्दै आएको छ । बसाहाको घना जङगल फाँडेर मानव बस्ती बसाएका थुलुङलाई आदर्श पुरुषको रुपमा मानेर उनको स्मृतिमा विभिन्न गतिबिधि गर्दै आएका छन् ।