१ महिना अघि
२0८१ माघ २२ मंगलवार
उदयपुर, माघ २२
महिलाहरुको पाठेघर (बच्चादानी)को मुखको हुने क्यान्सरबाट बचाउन उदयपुरमा ह्युमन प्यालोमा भाईरस (एचपिभी)विरुद्ध खोप आउदो २८ गतेदेखि सुरु हुने भएको छ । स्वास्थ्य कार्यालय उदयपुरका अनुसार माघ २३ देखि फागुन २ गतेसम्म खोप अभियान सञ्चालन गर्न लागिएको हो ।
कार्यालयका खोप सुपरभाईजर चिरञ्जिवी निरौलाका अनुसार जिल्लाका ४ नगर र ४ गाउँपालिका गरी ८ वटै स्थनीयतहमा २ चरणमा खोप अभियान चलाइनेछ । पहिलो चरणमा २३ गतेदेखि र दोस्रो चरणमा २८ गतेदेखि खोप अभियान चलाउने उनले बताए । पहिलो चरणमा त्रियुगा र बेलका नगरपालिका तथा रौतामाई गाउँपालिकामा २३ देखि २५ गतेसम्म ३ दिन खोप दिइनेछ । लिमचुङबुङ गाउँपालिकामा २३ र २४ गते २ दिन खोप लगाउने कार्यक्रम छ ।
त्यसैगरी दोस्रो चरणमा माघ २८ देखि फागुन २ गतेसम्म खोप दिने कार्यतालिका सार्वजनिक भएको छ । कटारी नगरपालिकामा २८ देखि फागुन २ गतेसम्म ५ दिन, चौदण्डीगढी नगर र उदयपुरगढी गाउँपालिकामा २८ देखि १ गतेसम्म ४ दिन र ताप्ली गाउँपालिकामा २८ देखि ३० गतेसम्म ३ दिन खोप दिइने कार्यक्रम रहेको छ ।
खोप अभियानमा कक्षा ६ देखि १० सम्म अध्ययनरत छात्राहरुलाई सहभागी गराइने छ । जसका लागि सरकारी सामुदायिक र सँस्थागत (नीजि) विद्यालयलाई नै खोपकेन्द्र बनाएर स्वास्थ्यकर्मी टोलीमार्फत खोप दिइनेछ । जिल्लाका ८ वटै स्थानीयतहका २ सय ८३ वटा विद्यालयमा खोप केन्द्र राखेर २० हजार १ सय २२ जना छात्रालाई एचपिभी खोप दिने कार्यक्रम रहेको सुपरभाईजर निरौलाले बताए ।
उदयपुरमा कक्षा ६ को छात्रा सङ्ख्या ३ हजार ६ सय ९ र ७ देखि १० सम्मका १३ हजार ४६ जना रहेका छन् । विद्यालयबाहिरका १० वर्ष उमेर समूहका बालिकाहरुलाई पनि खोप दिइने लक्ष रहेको छ । कार्यालयका अनुसार विद्यालयबाहिर २ सय २ जना बालिका छन् भने ११ देखि १४ वर्ष उमेर समूहका किशोरीको सङ्ख्या ३ हजार २ सय ६५ जना रहेको छ । उनीहरुलाई पनि कुनै न कुनै माध्यमबाट खोप दिलाउने योजना स्वास्थ्य कार्यालयले लिएको छ ।
जनस्वास्थ अधिकृत रामभरोस ठाकुरका अनुसार अभियान सफल पार्न जिल्लाभरी ३ सय ९६ खोप केन्द्र सञ्चालन हुनेछ । त्यसका लागि ४ सय ३ जना स्वास्थकर्मी र ७ सय ९९ जना स्वयंसेवक जनशक्ति परिचालन गरिएको छ ।
ठाकुरले नेपाली महिलाहरुमा बच्चादानीको मुखको क्यान्सर हुनुको ८० प्रतिशत कारण एचपिभी भाइरल भएकोे तथ्य पुष्टि भएसँगै देशभर खोप अभियान चलाइएको हो । बच्चादानीको क्यान्सरले मुलुकमा हरेक दिन ४ जना महिलाको मृत्यु हुने गरेको तथ्याङ्क स्वास्थ मन्त्रालयसँग रहेको ठाकुरले बताएका छन् ।
सरकारले एचपिभी खोप मुख्य ३ वटा लक्ष्य लिएर दिन थालेको हो । पहिलो लक्ष्य १० देखि १४ वर्ष उमेर समूहरका किशोरीमध्ये कम्तीमा ९० प्रतिशतलाई खोप दिने, दोस्रो ३० वर्ष माथिका महिलामध्ये ९० प्रतिशतको बच्चादानीको मुखको क्यान्सर पत्ता लगाउन परीक्षण गर्ने र तेस्रो क्यान्सर देखिएका महिलामध्ये ९० प्रतिशतको उपचार सफल पार्ने लक्ष्य छ ।
