२ महिना अघि
२0८१ माघ २१ सोमबार
उदयपुर, माघ २१
खोटाङको रावावेशी गाउँपालिका ५ दुवेकोलले महिला स्वास्थ्य स्वयंसेविकासहित विभिन्न उत्कृष्ट पेशाकर्मीहरुलाई सम्मान गरेको छ । चालुवर्ष ०८१–८२ को स्वीकृत बजेट तथा कार्यक्रम अनुसार स्वयंसेविकासहित पेशामा उत्कृष्टहरुलाई सम्मान गरेको हो ।
सम्मानित हुनेमा ११ जना महिला स्वास्थ्य स्वयंसेविका, स्वास्थ्यकर्मी, लुगा सिउने टेलर, डकर्मी, कृषक, अभिभावक, सबभन्दा जेष्ठ दम्पति रहेका छन् । स्वास्थ्य स्वयंसेविकाहरुलाई पानी तताउने विद्युतीय भाँडो (इलेक्ट्रिक जग) र दोसल्ला ओढाएर सम्मान गरियो ।
त्यसैगरी ‘उत्कृष्ट स्वास्थ्यकर्मी सम्मान कार्यक्रम’अन्तर्गत स्वास्थ्य चौकी दुवकोलका इञ्चार्ज तेजेन्द्रप्रकाश रेग्मी, उत्कृष्ट टेलर टेकबहादुर दर्जी, उत्कृष्ट डकर्मी पूर्णबहादुर नेपाली, उत्कृष्ट तरकारी उत्पादक काशीनाथ निरौला पनि सम्मानित भए । वडा कार्यालयले उत्कृष्ट अभिभावकमा गङ्गोदय माविकी देवीकुमारी दाहाल, कालिका आधारभूत विद्यालयकी चनमती थापामगर, खेती आधारभूत विद्यालयकी शर्मिला बास्तोला र वडाभरको सबभन्दा ज्येष्ठ दम्पति पदमबहादुर भुजेल र चिनीमाया भुजेलको जाडीलाई पनि सम्मान गरियो ।
वडाभित्र सञ्चालित २ वटा कृषि सङ्कलन केन्द्रका सञ्चालक तेजबहादुर राई र विक्रम घिमिरेलाई सामान तौलने विद्युतीय उपकरण, गङ्गोदय माविबाट २०८० मा एसइई उत्र्तीण विपन्न तथा जेहेन्दार छात्र भद्रबहादुर खड्कालाई नगद १५ हजार प्रदान गरिएको छ । त्यसैगरी २०८१ को दोस्रो त्रैमासिक परीक्षामा कक्षा प्रथम, द्वितीय र तृतीय हुने वडाभित्रका ३ विद्यालयका ६९ विद्यार्थी र २० जना विपन्न जेहेन्दारलाई पनि पुरस्कृत गरिएको छ ।
वडा सचिव शेरबहादुर दाहालले विपन्नलाई सहयोग कार्यक्रमअन्तर्गत वडाका विपन्न गोरमान भुजेल र हर्कबहादुर बिकलाई माउ पाठा बाख्रा सहयोग गरिएको बताए । वडाले डुम्रेधारापानी प्रहरी चौकीलाई एक सेट ग्यास र चुल्हो पनि प्रदान गरेको दाहालले बताए ।
उनीहरुलाई रावाबेसी गाउँपालिका अध्यक्ष फटिककुमार श्रेष्ठ, उपाध्यक्ष कौशिलाकुमारी गुरुङ, वडाध्यक्ष मनकुमार गुरुङ, गाउँपालिकाका प्रमुख प्रशासकीय अधिकृत सरोज रेग्मी, ६ नं. वडाध्यक्ष चिरञ्जीवी कार्की, पूर्व अध्यक्ष लिलानाथ निरौलालगायतले दोसल्ला, सामग्री, सम्मानपत्र र नगद पुरस्कार प्रदान गरेका थिए ।
