२ महिना अघि
२0८१ माघ २0 आईतवार
बसाहा, माघ २०
उदयपुरको चौदण्डीगढी नगरपालिका ४ बसाहामा भईरहेको ‘१० औँ नारद मुनि थुलुङ राई स्मृति गोल्डकप प्रतियोगिता ०८१’को उपाधिका लागि झापा ११ र सलेश युवा क्लब सिराहाबीच भिड्न्त हुने भएको छ । आईतबार सम्पन्न अन्तिम सेमिफाईनल खेल जितेसँगै झापाले अघिल्लो दिनको विजेता सलेशसँग उपाधिका लागि भिड्ने पक्का भएको हो ।
आईतबारको खेलमा एभरेष्ट फुटबल क्लब सुनसरीलाई १–० गोलले हराउँदै झापा ११ उपाधिको दावेदार बन्न पुगेको हो । झापाका लागि जर्सी नं. ९ का खेलाडी प्रदिप बुढाथोकीले खेल सुरु भएको ५ औँ मिनटमै गोल गरेर टिमलाई अघि बढाएका थिए । निर्धारित समयभित्र एभरेष्टबाट कुनै गोल हुन नसकेपछि बुढाथोकीको गोल नै निर्णायक बन्दै झापालाई फाईनलमा पु¥याएको हो ।
खेलको म्यान अफ द म्याच उनै बुढाथोकी घोषित भए । उनलाई चौदण्डीगढी नगरपालिका ७ का वडाध्यक्ष केशव अधिकारीले पुरस्कारस्वरुप ५ हजार नगद र ट्रफि प्रदान गरे ।
शनिबार भएको पहिलो सेमिफाईनलमा अघिल्लो वर्षको उपाधि विजेता बागमती फुटबल क्लब सर्लाहीलाई पराजित गर्दै सलेश फाईनलमा पुगेको हो । प्रतियोगिताको फाईनल खेल आउँदो २२ गते हुने आयोजक बसाहा क्लबका सल्लाहकार शेखर राईले बताएका छन् ।
आयोजक अध्यक्ष गौतम राईका अनुसार बसाहा गोल्डकप उदयपुरकै पहिलो र सबभन्दा ठूलो पुरस्कार राशीको प्रतियोगिता हो । विजेता टिमले ट्रफीसहित नगद ५ लाख पुरस्कार पाउने प्रतियोगिताको उपविजेतालाई २ लाख २५ हजार नगद, मेडल दिइने छ । त्यस्तै खेल अवधिभरका बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीलगायत विभिन्न ७ विधामा जनही ५ हजार पुरस्कार प्रदान गरिनेछ ।
गोल्डकप प्रतियोगिता गत असोज १७ गतेदेखि गर्ने तय भएकोमा विविध कारणले ४ महिना धकेलिएर अहिले आयोजना भईरहेको हो । असोजमा खेल्ने तय भएका मोरङको विराट मेघा स्पोर्टिङ एकेडेमी र काठमाडौँको चित्लाङ फुटबल क्लब यो प्रतियोगितामा सहभागी नभएपछि मोरङको एलएक्स र काठमाडौँको शङ्कटाले स्थान पाएका हुन् ।
जहानीया राणा शासनविरुद्धको २००७ सालको क्रान्तिका प्रजातान्त्रिक योद्धा नारद मुनि थुलुङ राईको स्मृतिमा बसाहा क्लबले डेढदशकयता वर्षेनी गोल्डकप आयोजना गर्दै आएको छ । ०४२÷४३ सालताका घना जङगल फाँडेर बसाहामा मानव बस्ती बसाएका थुलुङलाई स्थानीयले आदर्श पुरुष मान्दै उनको स्मृतिमा विभिन्न गतिबिधि गर्ने गरेका छन् ।
बसाहाका क्याम्पस, स्कुल र रङ्गशाला उनकै नाममा नामाकरण गरेर नारद आदर्श क्याम्पस, नारद आदर्श माध्यमिक विद्यालय, नारद मुनि थुलुङ स्मृति रङ्गशाला सञ्चालित छन् ।
