साकेलाको ‘राष्ट्रपति रनिङ शिल्ड’ राधाकृष्ण माविलाई

२ महिना अघि

उदयपुर, माघ २०

खोटाङको साकेला गाउँपालिकाले आयोजना गरेको ‘सातौँ अन्तरमाध्यमिक विद्यालयस्तरीय  राष्ट्रपति रनिङ शिल्ड प्रतियोगिता ०८१’ रााधाकृष्ण मावि बाँझेच्यानडाँडाले जितेको छ ।शनिबार सम्पन्न प्रतियोगितामा राधाकृष्ण मावि ८ स्वर्ण, ८ रजत र ५ काँस्य पदकसहित शिल्ड जित्न सफल भएको हो । 

साकेला १ स्थित आफ्नै खेलमैदानमा आयोजित राधाकृष्ण माविभन्दा एउटा रजत पदक कम ल्याउँदै साकेला २ रतन्छास्थित साकेला मावि दोस्रो भएको छ । साकेला माविले ८ स्वर्ण, ७ रजत र ४ काँस्य पदक जितेको छ । त्यसैगरी ५ स्वर्ण, ६ रजत र ७ काँस्य पदक हात पार्दै बालबालिका मावि मात्तिम नौलाखर्क तेस्रो स्थान लिन सफल भयो ।

प्रतियोगितामा गाउँपालिकाभित्रका विभिन्न ६ वटा माविका छात्रछात्राले सहभागिता जनाएका थिए । राधाकृष्ण माविकै व्यवस्थापनमा बुधबारदेखि सुरु भई शनिबार सम्पन्न प्रतियोगितामा ३ स्वर्ण, १ रजत र ३ काँस्य पदक जित्दै सरस्वती मावि मात्तिमबिर्ता चौथो हुँदा २ स्वर्ण, ५ रजत र ४ काँस्य पदक जितेको सिद्धेश्वरी मावि खिदिमा पाचाँै भएको छ । यसै वर्षदेखि प्रतियोगितामा भाग लिएको चण्डेश्वरी मावि डाँडागाउँले एउटा मात्र काँस्य पदक जितेको छ । 

प्रतियोगितामा छात्रछात्रा भलिवल, कबड्डी र एथलेटिक्सतर्फ हाईजम्प, लङजम्प, सटफुट (छेलो), ज्याभलिङ थ्रो तथा १ सय मिटरदेखि १५ सय मिटरसम्म दूरी तथा रिले दौडमा स्पर्धा गराइएको थियो । खेल व्यवस्थापक राधाकृष्ण माविका प्रधानाध्यापक हिराधन गुरुङका अनुसार प्रतियोगिता सञ्चालनका लागि सङ्घीय सरकार, खेलकुद मन्त्रालयले सशर्त कार्यक्रम अन्तर्गत १ लाख उपलब्ध गराएको थियो भने अपुग रकम गाउँपालिकाले बेहोरेको छ । 

शनिबार साँझ आयोजित समापन समारोहमा गाउँपालिका अध्यक्ष रविप्रकाश राई, १ नंं वडाध्यक्ष हेमन राई र गाउँ शिक्षा युवा तथा खेलकुद शाखा संयोजक कविराज राईले विजयी प्रथम, दोस्रो र तेस्रो हुने विद्यालयलाई शिल्ड, पदक तथा पमाणपत्र प्रदान गरे ।

सो अवसरमा प्रमुख अतिथि अध्यक्ष राईले गाउँपालिकाभित्रका खेलाडीहरुको खेलस्तर बृद्धि हुने प्रकारका गतिविधिलाई निरन्तरता दिदै लाने प्रतिबद्धता  जनाए । प्रतिभावान खेलाडीलाई प्रोत्साहनका लागि माथिल्लो निकायसम्म खेलकुदमा सहभागी हुने अवसर दिलाउन साकेला सरकार प्रतिवद्ध भएको घोषणा गर्दै अध्यक्ष राईले गाउँको सर्वाङ्गिण विकास गर्ने क्रममा खेलकुद क्षेत्रले ठूलो योगदान दिने बताए । 

साकेला सरकार गाउँगाउँमा लुकेका खेलाडी प्रतिभाको पहिचान गर्दै उनीहरुको स्तरबृद्धि गरेर राष्ट्रिय अन्तराष्ट्रियस्तरसम्म पु¥याउने प्रतिबद्धता पनि जनाए । खेलकुद जगतबाट गाउँको नाम राष्ट्रिय अन्तराष्ट्रियस्तरसम्म चिनाउने भएकाले सबै विदालयले आफ्ना विद्यार्थीलाई खेलकुद क्षेत्रमा लगाउन आग्रह गरे । 

प्रतियोगिता विजेता विद्यालयका खेलाडीले केहीदिनपछि हुने जिल्लास्तरीय राष्ट्रपति रनिङ शिल्डमा सहभागिता जनाउनेछन् ।