२ महिना अघि
२0८१ माघ २0 आईतवार
बसाहा, माघ २०
उदयपुरको चौदण्डीगढी नगरपालिका ४ बसाहामा जारी ‘१० औँ नारद मुनि थुलुङ राई स्मृति गोल्डकप फुटबल प्रतियोगिता ०८१’को फाईनलमा सिरहाको सलेश युवा क्लब पुगेको छ । शनिबार सम्पन्न पहिलो सेमिफाईनलमा सलेशले अघिल्लो वर्षको उपाधि विजेता बागमती फुटबल क्लब सलाईहीलाई २–० गोलले हराउँदै फाईनलमा पुगेको हो ।
सलेशका जर्सी नं. १७ का खेलाडी मिलन राई एक्लैको २ गोलले बागमतीको यो वर्षको खेलमा उपाधि सुरक्षा गर्न बाधा पुगेको हो । मध्यान्तरअघि गोल हुन नसकेको खेलमा ५० औँ मिनटमा पहिलो गोल गर्दै मिलनले टिमलाई अघि बढाएका थिए । ७० औँ मिनटमा उनकै अर्को प्रहार जाली चुम्न पुगेपछि बागमती स्तब्ध हुन पुगेको हो ।
अघिल्लो वर्षको गोल्डकप विजेता बागमतीले उद्घाटन खेलमा काठमाडौँको शङ्कटालाई पराजित गरेको थियो । सुरुवाती चरणकै खेलमा विजेता भएको बागमतीलाई यसवर्ष पनि उपाधि सुरक्षित गर्ला भन्ने धेरैले अनुमान गरेका थिए । तर, पहिलो सेमिफाईनलमा उसको निम्छरो प्रदर्शनले खेलप्रेमीको अनुमान मात्र गलत सावित भएन, आफै स्तब्ध हुनु पर्यो ।
खेलको म्यान अफ द म्याच पनि मिलन नै भए । उनलाई आयोजक बसाहा क्लबका अध्यक्ष गौतम राईले ५ हजार नगद र ट्रफि प्रदान गरे ।
आईतबार हुने सेमिफाईनलमा एभरेष्ट क्लब सुसरी र झापा ११ बीच प्रतिस्पर्धा हुनेछ । एभरेष्ट शुक्रबारको खेलमा न्यु त्रियुगा स्पोर्ट्स सप्तरीलाई हराउदै र झापा बुधबारको खेलमा घरेलु टिम बसाहा क्लबलाई पराजित गरी सेमिफाईनलमा पुगेका हुन् । फाईनल खेल २२ गते हुने प्रतियोगिता आयोजक बसाहा क्लबका सल्लाहकार शेखर राईले बताए ।
बसाहा गोल्डकप उदयपुरकै पहिलो र सबभन्दा ठूलो पुरस्कार राशीको प्रतियोगिता हो । अध्यक्ष राईका अनुसार प्रतियोगिता विजेता टिमले ट्रफीसहित नगद ५ लाख पुरस्कार पाउनेछ । उपविजेतालाई २ लाख २५ हजार नगद, मेडल दिइने प्रतियोगितामा खेल अवधिभरका बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीलगायत विभिन्न ७ विधामा जनही ५ हजार पुरस्कार प्रदान गरिनेछ ।
गोल्डकप प्रतियोगिता गत असोज १७ गतेदेखि गर्ने तय भएकोमा विविध कारणले ४ महिना धकेलिएर अहिले आयोजना भईरहेको हो । असोजमा खेल्ने तय भएका मोरङको विराट मेघा स्पोर्टिङ एकेडेमी र काठमाडौँको चित्लाङ फुटबल क्लब यो प्रतियोगितामा सहभागी नभएपछि मोरङको एलएक्स र काठमाडौँको शङ्कटाले स्थान पाएका हुन् ।
जहानीया राणा शासनविरुद्धको २००७ सालको क्रान्तिका प्रजातान्त्रिक योद्धा नारद मुनि थुलुङ राईको स्मृतिमा बसाहा क्लबले डेढदशकयता वर्षेनी गोल्डकप आयोजना गर्दै आएको छ । ०४२/४३ सालताका घना जङगल फाँडेर बसाहामा मानव बस्ती बसाएका थुलुङलाई स्थानीयले आदर्श पुरुष मान्दै उनको स्मृतिमा विभिन्न गतिबिधि गर्ने गरेका छन् ।
बसाहाका क्याम्पस, स्कुल र रङ्गशाला उनकै नाममा नामाकरण गरेर नारद आदर्श क्याम्पस, नारद आदर्श माध्यमिक विद्यालय, नारद मुनि थुलुङ स्मृति रङ्गशाला सञ्चालित छन् ।
क्याप्सनः म्यान अफ द म्याच मिलन राईलाई पुरस्कार दिदै अध्यक्ष गौतम राई । तस्विरः महेश्वर
