२ महिना अघि
२0८१ माघ १८ शुक्रबार
उदयपुर, माघ १८
उदयपुरको चौदण्डीगढी नगरपालिका ४ बसाहामा जारी ‘नारद मुनि थुलुङ राई स्मृति गोल्डकप प्रतियोगिता ०८१’मा एभरेष्ट फुटबल क्लब सेमिफाईनल पुगेको छ । शुक्रबार सम्पन्न अन्तिम क्वाटरफाईनल खेलमा न्यु त्रियुगा स्पोट्र्स क्लब सप्तरीलाई हराउँदै एभरेष्ट सेमिफाईनलको दावेदार भएको हो ।
एभरेष्टले न्यु त्रियुगालाई १–० गोलले हराउँदै सेमिफाईनलको यात्रा तय गरेको हो । मध्यान्तरअघि दुवैपक्षले गोल गर्न नसकेको खेलमा ५८ औँ मिनटमा एभरेष्टका लागि आशिष चापागाईले गोल गरेका थिए । उनको यही गोल अन्तिम र निर्णायक हुदै एभरेष्टका लागि सेमिफाईनलसम्म पुग्न सफल भयो ।
खेलको म्यान अफ द म्याच पनि चापागाई नै भए । उनलाई आयोजक बसाहा क्लबका अध्यक्ष गौतम राईले ५ हजार नगद र ट्रफि प्रदान गरे ।
यो खेलसँगै गोल्डकपको पहिलो चरणको खेल समाप्त भएको छ । शनिबारदेखि सुरु हुने सेमिफाईनल खेल आईतबारसम्म चल्नेछ । १९ गते हुने प्रतियोगिताको पहिलो सेमिफाईनल खेलमा अघिल्लो दिनको विजेता सलेश युवा क्लब सिराहा र उद्घाटन खेल विजेता बागमती युवा क्लब सर्लाहीबीच हुनेछ ।
आईतबारको सेमिफाईनलमा एभरेष्टले झापा ११ सँग प्रतिस्पर्धा गर्नेछ । झापाले बुधबारको खेलमा घरेलु टिम बसाहा क्लबलाई पराजित गर्दै सेमिफाईनलको यात्रा तय गरेको थियो । प्रतियोगिताको फाईनल खेल २२ गते हुने आयोजक बसाहा क्लबका सल्लाहकार शेखर राईले बताए ।
बसाहा गोल्डकप उदयपुरकै पहिलो र सबभन्दा ठूलो पुरस्कार राशीको प्रतियोगिता हो । अध्यक्ष राईका अनुसार प्रतियोगिता विजेता टिमले ट्रफीसहित नगद ५ लाख पुरस्कार पाउनेछ । उपविजेतालाई २ लाख २५ हजार नगद, मेडल दिइने प्रतियोगितामा खेल अवधिभरका बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीलगायत विभिन्न ७ विधामा जनही ५ हजार पुरस्कार प्रदान गरिनेछ ।
गोल्डकप प्रतियोगिता गत असोज १७ गतेदेखि गर्ने तय भएकोमा विविध कारणले ४ महिना धकेलिएर अहिले आयोजना भईरहेको हो । असोजमा खेल्ने तय भएका मोरङको विराट मेघा स्पोर्टिङ एकेडेमी र काठमाडौँको चित्लाङ फुटबल क्लब यो प्रतियोगितामा सहभागी नभएपछि मोरङको एलएक्स र काठमाडौँको शङ्कटाले स्थान पाएका हुन् ।
जहानीया राणा शासनविरुद्धको २००७ सालको क्रान्तिका प्रजातान्त्रिक योद्धा नारद मुनि थुलुङ राईको स्मृतिमा बसाहा क्लबले डेढदशकयता वर्षेनी गोल्डकप आयोजना गर्दै आएको छ । ०४२÷४३ सालताका घना जङगल फाँडेर बसाहामा मानव बस्ती बसाएका थुलुङलाई स्थानीयले आदर्श पुरुष मान्दै उनको स्मृतिमा विभिन्न गतिबिधि गर्ने गरेका छन् ।
बसाहाका क्याम्पस, स्कुल र रङ्गशाला उनकै नाममा नामाकरण गरेर नारद आदर्श क्याम्पस, नारद आदर्श माध्यमिक विद्यालय, नारद मुनि थुलुङ स्मृति रङ्गशाला सञ्चालित छन् ।
