साकेलामा धुमधाम सोनाम ल्होसार

२ महिना अघि

उदयपुर, माघ १८

खोटाङको साकेला गाउँपालिकामा तामाङ समुदायको सोनाम ल्होसार धुमधामसँग मनाइएको छ । गाउँपालिकामा बसोबास गर्दै आएका तामाङ समुदायले बिहीबार विविध कार्यक्रम गरी ल्होसार मनाएका हुन् । 

ल्होछारमा जनप्रतिनिधि, राजनीतिक दलहरु, नागरिक अगुवाहरुको उपस्थितिमा शुभकामना आदानप्रदान गरिएको थियो । वडा नं. ३ खिदिमास्थित नयाङ्ला गुम्बा व्यवस्थापन समितिद्वारा आयोजित ‘मञ्जुश्री सम्बत २८६१ सोनाम ल्होसार’ कार्यक्रम गाउँपालिका अध्यक्ष रविप्रकाश राईले उद्घाटन गरे । सो क्रममा अध्यक्ष राईले साकेलामा बसोबास गर्ने सबै जातजाति, धर्म, सँस्कृति, भेषभुषा र विविधतालाई सम्मान गर्दै साँस्कृतिक विकासमार्फत समृद्ध साकेला निर्माण गर्न सकिने बताए । 

अध्यक्ष राईले साकेला सरकार सबै जातजातिको धर्म, सँस्कार र सँस्कृतिको सम्मान गर्दै अघि बढिरहेको बताउँदै बहुजातीय, बहुभाषिक, बहुसाँस्कृतिक विविधतायुक्त नेपाली समाज सोनाम ल्होछारजस्ता चाडपर्वबाट लाभ लिन सक्नुपर्ने बताए । सबै नेपालीबीच आपसी सद्भाव, सहिष्णुता र बन्धुत्वको भावना अभिवृद्धि गर्ने यस्ता चाडपर्वहरुको संरक्षण र संबद्र्धन गर्दै अघि बढ्न साकेला सरकार तयार रहेको उनको प्रतिबद्धता थिजयो । 

‘सोनाम ल्होछारले सबै जातजातिबीचको एकतालाई अझ सुदृढ गर्दै आर्थिक र सामाजिक रूपले समृद्ध पालिका हुँदै देशलाई नै समृद्ध बनाउन मद्धत गर्ने हाम्रो ठहर छ’ अध्यक्ष राईले भने ‘साकेला गाउँपालिकाभित्र १३ जातजाति समुदायको धर्म, सँस्कार र सँस्कृतिको संरक्षण गर्न योजना बनाएर लागिरहेका छौँ ।’ 

उनले सडक र भवनजस्ता भौतिक पूर्वाधार बन्नुलाई मात्र विकास मान्न नसकिने भन्दै विकास भनेको मानवजातिको सभ्यता, समुदाय र धर्मावलम्बीको धर्म, सँस्कार र सँस्कृतिको संरक्षण र सम्वद्र्धनजस्ता साँस्कृतिक विकास पनि अनिवार्य रहेको बताए । यसरी सबैखाले विकासमार्फत साकेलालाई देशकै नमूना गाउँ बनाउने अभियान चलाईरहेको उनले बताए । 

साकेलाले जातजाति र धर्म, सँस्कृतिमा आधारित चित्रकलाको माध्यमद्वारा गाउँपालिकालाई चिनाउने अभियान चलाएको स्मरण पनि उनले गराए । गाउँपालिकाले विभिन्न ठाउँमा भित्ता र ढुङ्गामा चित्रकलाको माध्यमद्वारा सबै जाति, धर्म, सँस्कार र सँस्कृतिसँग सम्बन्धित देवी देवताको चित्र बनाईरहेको पनि उनले बताए । 

‘हेर्दा यो कुरा सामान्य लाग्न सक्छ तर, गाउँपालिकाको यो चित्रकला अभियान सबै जातजाति, धर्म, सँस्कार र सँस्कृतिलाई सम्मान गर्नका लागि चलाएको हो’ अध्यक्ष राईले थपे ‘यसले साकेलाबासी सबै जाति, समुदाय र धर्मावलम्बीलाई स्थानीय सरकार समान रुपले सम्मान गर्छ भन्ने उदाहरण हो ।’ 

विविधतायुक्त समाज निर्माण नै साकेलाको पहिचान हो भन्ने देखाउन चित्रकला अभियान चलाइएको अध्यक्ष राईको भनाई थियो । गाउँपालिकामा भईरहेका सबैखाले विकास निर्माणमा सबै तह, तप्काको नागरिकको सकारात्मक सहयोग चाहिएको पनि उनले बताए । 

नियाङ्ला गुम्बा व्यवस्थापन समिति अध्यक्ष शुक्र तामाङले सङ्घीयता र गणतन्त्रकालमा सबै जाति, धर्म, सँस्कार र सँस्कृतिको संरक्षण, संबद्र्धन र सुरक्षाको प्रत्याभूत हुने बताउँदै यसले आपसी सदभाव र भाइचारामा विकास गर्ने बताए । शुभकामना आदानप्रदान कार्यक्रममा उपाध्यक्ष बिर्सिका राई, गाउँपालिकाका पूर्वअध्यक्ष अर्जुन खड्का, काँग्रेस प्रदेश समिति सदस्य शान्तिकला राई, एमाले प्रदेश कमिटी सदस्य प्रभातविक्रम कटवाललगायतले मन्तव्य राखेका थिए । 

गुम्बा अध्यक्ष तामाङका अनुसार मञ्जुश्री पात्रोअनुसार बिहीबारदेखि २८६१ औँ वर्ष सुरु भएको छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर
र सुँगुर गरी १२ बर्ग (वर्ष)मा विभाजित सोनाम ल्होछारको यो नयाँ बर्गको चाडको रुपमा मनाइएको हो । तामाङ समुदायले प्रत्येक वर्ष माघ मध्येमा विभिन्न कार्यक्रम गरी सोनाम ल्होछार मनाउदै आएको छ ।