लालशेर राई स्मृति मेयरकप बोक्सेले चुम्यो 

२ महिना अघि

उदयपुर, माघ १८

गाईघाटमा सम्पन्न ‘२४ औँ लालशेर राई स्मृति मेयरकप फुटबल प्रतियोगिता २०८१’को उपाधि बोक्सेले चुमेको छ । गाईघाटस्थित थरुहट उदयपुर रङ्गशालामा बिहीबार भएको फाइनल खेलमा त्रियुगा १० बोक्सेले १२ नं. वडा डिएमगेटलाई पराजित गर्दै उपाधि चुमेको हो । 

बोक्सेले ४–१ गोलको अन्तरले उपाधि जितेको हो । मध्यान्तरअघिको समय दुवै टिमबाट गोल हुन नसके पनि मध्यान्तरपछि बोक्सेले लगातार गोलको वर्षा गर्दै उपाधि हात पारेको हो । मध्यान्तरपछि ३७ औँ र ४७ औ मिनेटमा बोक्सेका लागि अर्जुन मगरले २ गोल गर्दै टिमलाई अगाडि बढाएका थिए । लगत्तै बोक्सेकै अर्का खेलाडी सनम राई र लक्की राईले थप १–१ गोल गर्दै टिमलाई ४ गोल दिलाएका थिए । 

गोलको वर्षाले रन्थनिएको डिएमगेट आक्रोसित हुँदै ६६ औँ मिनटमा १ गोल गर्न सफल भयो । डिएमगेटका लागि रविशङ्कर चौधरीको प्रहारले मात्र जाली चुम्न सफल भए पनि बोक्सेलाई टक्कर दिन असफल हुँदा उपविजदेतामा चित्त बुझाउन बाध्य भयो । फाइनल खेलको म्यान अफ द म्याच बोक्सेकै दिपक मगर घोषित भए । उनलाई १ हजार नगदसहित ट्रफी प्रदान गरियो । 

गएको ९ गतेदेखि सुरु प्रतियोगिता विजेता बोक्लेले ५० हजार नगदसहित ट्रफी, मेडर र प्रमाणपत्र प्रदान गरिएको छ । भने उपविजेता डिएमगेटलाई ३० हजार नगद र प्रमाणपत्र प्रदान गरियो । विहीबार साँझ आयोजित समापन समारोहमा त्रियुगा नगरप्रमुख वसन्त बस्नेतले विजेता टिम र खेलाडीलाई नगद, ट्रफि र प्रमाणपत्र प्रदान गरे । 

प्रतियोगितामा विधागत विजेतातर्फ सर्वोत्कृष्ट खेलाडीको उपाधि बोक्सेका सनम राई घोषित भए भने बेस्ट गोलकिपर बोक्सेकै उमेश थापा, बेस्ट डिफेन्स डिएमगेटका युवराज थापा, डिएमगेटकै अनुराग चौधरी बेस्ट डिफेन्स भए । त्यस्तै हाई स्कोरर बोक्सेका अर्जुनकुमार मगर, बोक्सेकै दिपेन्द्र दाहाल बेस्ट कोचको उपाधिबाट सम्मानित भए । 

बोक्सेका विरामी खेलाडीद्वय सुदिप श्रेष्ठ र सुनिल सुर्खेतीको स्वास्थ्य लाभको कामना गर्दै आयोजित प्रतियोगिताका सर्वोत्कृष्ट खेलाडी राईलाई ३ हजार र बाँकी अन्य विधाका उपाधि प्राप्त खेलाडीलाई जनही २ हजारका दरले नगद र प्रमाणपत्र प्रदान गरियो । 

त्रियुगाका सँस्थापक नगरप्रमुख स्वर्गीय लालशेर राईको २४ औँ स्मृति दिवसको अवसर पारेर प्रतियोगिता आयोजना गरिएको नगर युवा तथा खेलकुद विकास समितिले जनाएको छ । आयोजक जिल्ला फुटबल सङ्घ (एन्फा) उदयपुरका अध्यक्ष रञ्जन कार्कीका अनुसार नगर खेलकुद विकास समितिको संयोजन र नगरपालिकाको प्रायोजनमा सम्पन्न प्रतियोगितामा नगरका १६ मध्ये १४ वडाबाट खेलाडी टिम सहभागी थिए ।