२ महिना अघि
२0८१ माघ १७ बिहीबार
बसाहा, माघ १७
उदयपुरको चौदण्डीगढी नगरपालिका ४ बसाहामा जारी ‘नारद मुनि थुलुङ राई स्मृति गोल्डकप प्रतियोगिता ०८१’को तेस्रो दिनको खेल सलेश युवा क्लब सिराहाले जितेको छ । सलेसले मोरङको एलएक्स फुटबल क्लबलाई २–० ले हराउँदै विजयी यात्रा थालेको हो ।
खेल सुरु भएको २३ औँ मिनटमा सलेशका लागि श्याम मुरमुरको प्रहारले जाली चुमेको थियो । तर, ४० औँ मिनटमा एलएक्सका रोहन कार्कीले गोल फर्काउदै खेललाई बराबरी बनाए । मध्यान्तरपछि ६० औँ मिनटमा सलेशका अर्का खेलाडी मिलन राईले दोस्रो गोलगर्दै टिमलाई विजयी बनाए ।
सलेशसँग हारसँगै एलएक्स प्रतियोगिताको मैदानबाट बाहिरिन बाध्य भएको छ भने जितसँगै सलेश सेमिफाईनलको हकदार भएको छ । १९ गते हुने पहिलो सेमिफाईनल खेलमा सलेशले उद्घाटन खेल विजेता बागमती युवा क्लब सर्लाहीको सामना गर्नुपर्नेछ ।
खेलको म्यान अफ द म्याच सलेशका मिलन राई घोषित भए । उनलाई नगद ५ हजार पुरस्कारका साथ ट्रफी प्रदान गरियो ।
शुक्रबारको खेलमा न्यु त्रियुगा स्पोर्टस् क्लब सप्तरी र एभरेष्ट फुटबल क्लब सुनसरीबीच प्रतिस्पर्धा हुने आयोजक बसाहा क्लबका सल्लाहकार शेखर राईले बताए । प्रतियोगिताको सेमिफाईनल १९ र २० गते हुनेछ भने फाईनल २२ गते हुनेछ ।
क्लबका अध्यक्ष गौतम राईका अनुसार बसाहा गोल्डकप उदयपुरकै पहिलो र सबभन्दा ठूलो पुरस्कार राशीको प्रतियोगिता हो । विजेता टिमलाई ट्रफीसहित नगद ५ लाख पुरस्कारको व्यवस्था गरिएको प्रतियोगिताका उपविजेताले २ लाख २५ हजार नगद, मेडल र प्रमाणपत्र पाउनेछ ।
बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीलगायत विभिन्न ७ विधागत पुरस्कार जनही ५ हजारसहित मेडल र प्रमाणपत्र प्रदान गरिने अध्यक्ष राईले बताए ।
प्रतियोगिता गत असोज १७ गतेदेखि गर्ने तय भए पनि विविध कारणले ४ महिना धकेलिएर अहिले गर्नुपरेको हो । त्यसबेला खेल्ने तय भए पनि अहिले सहभागी नभएका मोरङको विराट मेघा स्पोर्टिङ एकेडेमी र काठमाडौँको चित्लाङ फुटबल क्लबको ठाउँ पाएका मोरङको एलएक्स र काठमाडौँको शङ्कटा दुवै मैदान बाहिर गईसकेका छन् ।
राणा शासनविरुद्धको २००७ सालको क्रान्तिका प्रजातान्त्रिक योद्धा नारद मुनि थुलुङ राईको स्मृतिमा बसाहा क्लबले डेढदशकयता वर्षेनी गोल्डकप आयोजना गर्दै आएको छ । ०४२÷४३ सालताका घना जङगल फाँडेर बसाहामा मानव बस्ती बसाएका थुलुङलाई स्थानीयले आदर्श पुरुष मान्दै उनको स्मृतिमा विभिन्न गतिबिधि गर्ने गरेका छन् ।
बसाहाका क्याम्पस, स्कुल र रङ्गशाला उनकै नाममा नामाकरण गरेर नारद आदर्श क्याम्पस, नारद आदर्श माध्यमिक विद्यालय, नारद मुनि थुलुङ स्मृति रङ्गशाला सञ्चालित छन् ।
