साकेलामा राष्ट्रपति रनिङ शिल्ड सुरु

२ महिना अघि

उदयपुर, माघ १७

खोटाङको साकेला गाउँपालिकामा अन्तर माध्यमिक विद्यालयस्तरीय राष्ट्रपति रनिङ शिल्ड प्रतियोगिता सुरु भएको छ । साकेला गाउँपालिकाको आयोजना र वडा नं. १ बाँझेच्यानडाँडास्थित राधाकृष्ण माध्यमिक विद्यालयको व्यवस्थापनमा बुधबारदेखि सातौँ सँस्करणको प्रतियोगिता सुरु भएको हो । 

बाँझे खेलमैदानमा सुरु प्रतियोगितामा भलिवल र कबड्डीतर्फ छात्रछात्राको प्रतिस्पर्धा हुनेछ भने एथ्लेटिक्सतर्फ हाईजम्प, लङ्गजम्प, सटफुट (छेलो) र रिले दौड, १ सय मिटर, २ सय मिटर, ४ सय मिटर र ८ सय मिटरमा छात्रछात्राले प्रतिस्पर्धा गर्नेछन् । विभिन्न २६ विधामा स्वर्ण, रजत र कास्य पदकका लागि प्रतिस्पर्धा हुने प्रतियोगिता ३ दिनसम्म चल्ने व्यवस्थापकीय जिम्मा पाएको राधाकृष्ण माविका प्रधानाध्यापक हिराधन गुरुङलले बताएका छन् । 

प्रत्येक इभेण्टमा विजेता विद्यालयले ट्रफी र प्रमाणपत्र प्राप्त गर्नेछन् भने सबै विधामा विजेता विद्यालयलाई रनिङ शिल्ड प्रदान गर्ने कार्यक्रम रहेको प्रअ गुरुङले बताए । प्रतियोगिता सञ्चालनका लागि  सङ्घीय सरकार, शिक्षा, विज्ञान तथा प्रविधि मन्त्रालयले सशर्त कार्यक्रममार्फत १ लाख उपलब्ध गराएको छ भने अपुग रकम गाउँपालिकाले व्यवस्थापन गर्नेछ । 

सहभागी विद्यालयहरुलाई प्रतियोगितास्थल आउन–जान तथा अन्य व्यवस्थापन खर्च पनि गाउँपालिकाले बेहोर्नेछ । प्रतियोगितामा स्वर्ण पदक जित्ने खेलाडीले जिल्लास्तरीय राष्ट्रपति रनिङ शिल्डमा भाग लिन पाउने गाउँपालिकाका शिक्षा शाखा प्रमुख कविराज राईले बताए । उनका अनुसार प्रतियोगितामा गाउँपालिकाभरीका ६ वटा माध्यमिक विद्यालयको सहभागिता रहनेछ । 

बुधबार दिउसो एक कार्यक्रमका बीच गाउँपालिका अध्यक्ष रविप्रकाश राईले प्रतियोगिताको उद्घाटन गरे । कार्यक्रममा अध्यक्ष राईले खेलकुदको माध्यमबाट राष्ट्रिय अन्तर्राष्ट्रियस्तरसम्म साकेलालाई चिनाउन स्थानीय सरकार प्रतिवद्ध भएर लागिरहेको बताए । गाउँपालिकाको समग्रक्षेत्रको विकास गर्ने उदेश्यले नै ‘सुसँस्कृत, सँस्थागत र समृद्ध साकेला’ भन्ने नाराका साथ अघि बढिरहेको बताउँदै अध्यक्ष रार्यले त्यसका लागि खेलकुद क्षेत्रले पनि ठूलो योगदान दिनसक्ने बताए । 

गाउँपालिकाको खेलकुद जगतलाई माथि उठाउन संस्थागत रुपमा लागी पर्ने बताउदै उनले आजका विद्यार्थी नै भोलिका कर्णधार भएकाले उनीहरुको समग्र बृत्ति विकासमा ध्यान दिन जरुरी रहेको बताए ।  प्रतियोगितामा सहभागी विद्यालय र खेलाडीलाई आफ्नो विद्यालयको जितका लागि मात्र खेल खेल्ने नभएर सिङ्गो गाउँपालिकाको प्रतिष्ठालाई माथि उठाउने दृढ संकल्पका साथ सहभागी हुन आग्रह गरे । अध्यक्ष राईले गाउँपालिकास्तरीय छनौट खेलबाट जिल्ला, प्रदेश र सङघीयस्तरसम्म सहभागी हुन पाउने भएकाले यो प्रतियोगिता आफैमा महत्वपूर्ण रहेको बताए । 

साकेलाको भविष्य निर्माणका लागि सबै तह र तप्काका नागरिकहरु एक भएर लाग्नुपर्नेमा जोड दिदै राईले साकेलामा अहिले थुप्रै भौतिक विकास निर्माणको काममा अवरोध हुने गरेको गुनासो गरे ।  विकास निर्माणका लागि प्राप्त योजनाहरु कटौती गरेर समृद्ध गाउँपालिका निर्माणमा बाधा पुर्याउन केही व्यक्तिहरु प्रत्यक्ष र अप्रत्यक्ष रुपमा लागिरहेको बताए । ‘साकेलाबासीका लागि प्राप्त थुप्रै विकासे योजनालाई असफल बनाउन केही व्यक्तिहरु लागिरहेका छन्’ अध्यक्ष राईले भने ‘यसप्रति तपाँई हामी सबै नागरिक सचेत भएर विकासविरोधीको भण्डाफोर गर्नुपर्छ । विकासमा अवरोध गर्ने हो भने साकेला गाउँपालिकाको समृद्धिको सपना कहिल्यै पूरा हुँदैन । त्यसैले समृद्ध पालिका निर्माणका लागि सबै तह र तप्का एकजुट भएर लागि पर्न आवश्यक छ ।’

उपाध्यक्ष बिर्सिका राईले गाउँपालिकालाई समृद्धिको गन्तव्यमा पुर्याउन खेलकुद जगतको उत्तिकै महत्वपूर्ण भूमिका हुने बताईन् । साकेलालाई हरेक क्षेत्रबाट समृद्ध बनाउन स्थानीय सरकार लागिरहेको बताउँँदै उपाध्यक्ष राईले हरेक विकास र गतिविधिहरुमा आम नागरिकको अर्थपूर्ण सहयोग र सहभागिता हुनुपर्नेमा जोड दिईन् । १ नंं वडाध्यक्ष हेमन राईको अध्यक्षतामा भएको उद्घाटन कार्यक्रममा प्रवक्ता तथा ५ नं. वडाडाध्यक्ष जीवन खत्री, गाउँपालिकाका निमित्त प्रमुख प्रशासकीय अधिकृत दुर्गबहादुर राई, जनप्रतिनिधिहरु, विद्यालयका प्रअ तथा शिक्षकहरु, पूर्व जनप्रतिनिधिलगायतको उपस्थिति थियो ।