२ महिना अघि
२0८१ माघ १६ बुधबार
बसाहा, माघ १६
अघिल्लो दिनदेखि उदयपुरमा जारी ‘नारद मुनि थुलुङ राई स्मृति गोल्डकप फुटबल प्रतियोगिता ०८१’को दोस्रो दिनको खेल झापा ११ ले जितेको छ । आयोजक घरेलु टिम बसाहा क्लबलाई १–० गोलको अन्तरले हराउँदै झापाले विजयी यात्रा सुरु गरेको छ ।
चौदण्डीगढी नगरपालिका ४ बसाहा बर्खेडाँडास्थित नारद स्मृति रङ्गशालामा भईरहेको प्रतियोगिताको बुधबारको खेलमा झापाका लागि पेमा लामाले गरेको पहिलो गोल नै अन्तिम र निर्णायक हुन पुग्यो । निर्धारित ९० मिनटभित्र दुवैपक्षबाट गोल हुन नसकेपछि इन्ज्युरी समयका लागि २ मिनट थपिएको थियो । सोही समयको सदुपयोग गर्दै पेमाले गरेको गोल नै झापाका लागि सुखद परिणाम दिन सफल भयो ।
क्लबका सल्लाहकार शेखर राईका अनुसार यो १० औँ सँस्करणको प्रतियोगितामा विहीबार सिराहाको सलेश युवा क्लब र मोरङको एलएक्स सिटी क्बलबीच भिडन्त हुनेछ । चौथो दिन १८ गते हुने अन्तिम क्वाटरफाईनल खेल न्यु त्रियुगा स्पोर्टस् क्लब सप्तरी र एभरेष्ट फुटबल क्लब सुनसरीबीच हुनेछ ।
सेमिफाईनल खेल १९ र २० गते खेलाइने प्रतियोगिताको फाईनल पुस २२ गते हुने खेल तालिका रहेको छ । आयोजक क्लबका अध्यक्ष गौतम राईका अनुसार बसाहा गोल्डकप उदयपुरको पहिलो र सबभन्दा ठूलो पुरस्कार राशीको प्रतियोगिता हो । ट्रफिसहित नगद ५ लाख विजेताले पाउनेछ भने उपविजेतालाई २ लाख २५ हजार नगदसहित मेडल र प्रमाणपत्र दिइनेछ ।
प्रत्येक दिन म्यान अफ द म्याच घोषित गरी ५ हजार नगदसहित ट्रफि प्रदान गरिने प्रतियोगिता अवधिभर बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीजस्ता ७ विधागत पुरस्कार पनि जनही ५ हजार नगद र मेडल रहेको अध्यक्ष राईले बताए ।
गत असोज १७ गतेदेखि गर्ने भनिएको गोल्डकप विविध कारणवश ४ महिना पछि धकेलिएर अहिले आयोजना गर्नु परेको हो । असोजमा खेल्न तयार भएका मोरङको विराट मेघा स्पोर्टिङ एकेडेमी र काठमाडौँको चित्लाङ फुटबल क्लब भने यो प्रतियोगितामा सहभागी हुन भ्याएनन् । उनीहरुको सट्टा मोरङको एलएक्स र काठमाडौँको शङ्कटा सहभागी भएका छन् ।
राणा शासनविरुद्ध छेँडिएको २००७ सालको प्रजातान्त्रिक आन्दोलनका अगुवा क्रान्ति योद्धा नारद मुनि थुलुङ राईको स्मृतिमा बसाहा क्लबले वर्षेनी गोल्डकप आयोजना गर्दै आएको छ । ०४२÷४३ सालताका घना जङगल फाँडेर बसाहामा मानव बस्ती बसाएका थुलुङलाई बसाहाबासीले आदर्श व्यक्तिका रुपमा मान्दै उनको स्मृतिमा विभिन्न गतिबिधि गर्दै आएका छन् ।
बसाहामा नारद आदर्श शिक्षा क्याम्पस, नारद आदर्श माध्यमिक विद्यालय, रङ्गशाला उनकै नामबाट नामाकरण गरिएका छन् । गोल्डकप पनि हरेक वर्ष उनकै स्मृतिमा आयोजना हँुदै आएको र यो वर्षको खेल दशौँ सँस्करण भएको क्लबले जनाएको छ ।
