नारद मनि गोल्ड कपः उद्घाटन खेल बागमतिले जित्यो

२ महिना अघि

२0८१ माघ १५ मंगलवार
नारद मनि गोल्ड कपः उद्घाटन खेल बागमतिले जित्यो

बसाहा, माघ १५

आजदेखि उदयपुरमा सुरु भएको ‘नारद मुनि थुलुङ राई स्मृति गोल्डकप फुटबल प्रतियोगिता’ बागमति स्पोर्टस् क्लब सर्लाहीले जितेको छ । गतवर्षको उपाधि विजेता बागमतिले १–० गोलको अन्तरले काठमाडौँको शङकटा क्बललाई हराउँदै विजयी यात्रा सुरु गरेको हो । 


चौदण्डीगढी नगरपालिका ४ बसाहामा सुरु प्रतियोगिता निर्धारित ९० मिनटको अवधि दुवैपक्षबाट गोलरहित सकिएपछि थप २ मिनटको इन्ज्युरी समयलाई उपयोग गर्दै बागमतिका अफ्रिकन खेलाडी हानाले गरेको गोल नै अन्तिम र बागमतिका लागि निर्णायक बन्न पुगेको हो । 


बसाहाको बर्खेडाँडास्थित ‘नारद मुनि थुलुङ रङ्गशाला’मा भईरहेको १० औँ सँस्करणको यो प्रतियोगिताको बुधबारको खेलमा झापा ११ फुटबल क्लबसँग आयोजक बसाहा क्लबबीच प्रतिस्पर्धा हुनेछ । तेस्रो दिन सिराहाको सलेश युवा क्लब र मोरङको एलएक्स सिटी क्बलबीच भिडन्त हुनेछ भने १८ गते सप्तरीको न्यु त्रियुगा स्पोर्टस् क्लब फत्तेपुर र सुनसरीको एभरेष्ट फुटबल क्लबबीच हुने आयोजक क्बलका अध्यक्ष गौतम राईले बताए । 


सेमिफाईनल १९ र २० गते खेलाइने प्रतियोगिताको फाईनल खेल भने पुस २२ गते हुने आयोजक क्लबले जनाएको छ । क्लबका सल्लाहकार शेखर राईका अनुसार गत असोज १७ गतेदेखि गर्ने भनिएको प्रतियोगिता विविध कारणवश ४ महिना पछि धकेलिएर अहिले आयोजना गर्नु परेको हो । 


बसाहा गोल्डकप उदयपुरको पहिलो र सबभन्दा ठूलो पुरस्कार राशीको गोल्डकप हो । विजेतालाई ट्रफिसहित नगद ५ लाख प्रदान गरिनेछ भने उपविजेताले २ लाख २५ हजार नगदसहित मेडल र प्रमाणपत्र पाउनेछ । त्यसैगरी प्रत्येक दिन म्यान अफ द म्याचलाई ५ हजार नगद र ट्रफि तथा बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीजस्ता ७ विधामा पनि जनही ५ हजार नगद र मेडल वितरण गरिने अध्यक्ष राईले बताए । 


राणा शासनविरुद्ध छेँडिएको २००७ सालको प्रजातान्त्रिक आन्दोलनका अगुवामध्येका क्रान्ति योद्धा नारद मुनि थुलुङ राईको स्मृतिमा बसाहा क्लबले डेढ दशकयता वर्षेनी गोल्डकप प्रतियोगिता गर्दै आएको छ । ०४२÷४३ सालताका घना जङगल फाँडेर बसाहा बस्ती बसाएका क्रान्त्रि योद्धा थुलुङलाई बसाहाबासीले एक आदर्श पुरुषका रुपमा मान्दै उनको स्मृतिमा फुटबललगायत विभिन्न गतिबिधि गर्दै आएका छन् । 

 

ब्साहामा नारद आदर्श शिक्षा क्याम्पस, नारद आदर्श माध्यमिक विद्यालय, रङ्गशाला उनकै नामबाट नामाकरण गरिएका छन् । गोल्डकप पनि हरेक वर्ष उनकै स्मृतिमा आयोजना हँुदै आएको र यो वर्षको खेल दशौँ सँस्करण भएको क्लबले जनाएको छ ।