२ महिना अघि
२0८१ माघ १५ मंगलवार
उदयपुर, माघ १५
उदयपुरको पहिलो गोल्डकप तथा सर्वाधिक धनराशी पुरस्कारको ‘नारद मुनि थुलुङ राई स्मृति गोल्डकप फुटबल प्रतियोगिता’ आजदेखि सुरु हुँदैछ । चौदण्डीगढी नगरपालिका ४ को बसाहा क्लबको आयोजनामा हुने प्रतियोगिता बसाहाको बर्खेडाँडास्थित नारद आदर्श रङ्गशालामा सुरु हुने गरी सबै तयारी अघिल्लो दिन नै भईसकेको छ ।
१० औँ सँस्करणको गोल्डकप आगामी २२ गतेसम्म सञ्चालन हुने क्लबका सल्लाहकार शेखर राईले बताए । गत असोज १७ गतेदेखि सञ्चालन गर्ने भनिएको गोल्डकप विविध कारणले ४ महिनापछि धकेलिदै आजदेखि हुन लागेको राईले बताए । प्रतियोगितामा काठमाडौँ, झापा, मोरङ, सुनसरी, सर्लाही, सप्तरी र सिराहाका विभिन्न ८ वटा राष्ट्रिय खेलाडी क्बलको सहभागिता हुनेछ ।
उद्घाटन खेलमा काठमाडौँको शङ्कटा क्लब र सर्लाहीको बागमति युवा क्बलबीच सुरुवाती प्रतिस्पर्धा हुनेछ । दोस्रो दिन १६ गते आयोजक बसाहा क्लब र झापा ११ फुटबल क्लबबीच र तेस्रो दिनको खेलमा सिराहाको सलेश युवा क्लबसँग मोरङको एलएक्स सिटी क्बलको भिडन्त हुनेछ । १८ गते सप्तरीको न्यु त्रियुगा स्पोर्टस् क्लब फत्तेपुरसँग सुनसरीको एभरेष्ट फुटबल क्लबले शक्ति दाँज्ने छ भने १९ र २० गते सेमिफाईनल र २२ गते फाईनल खेलाइने छ ।
बसाहा क्लबका अध्यक्ष गौतम राईका अनुसार असोजमा खेल्ने तय भएका केही टिम भने बद्लिएका छन् । असोजको प्रतियोगितामा विराट मेघा स्पोर्टिङ एकेडेमी मोरङ र चित्लाङ फुटबल क्लब काठमाडौँ यो बेला समय निकाल्न नसकेर सहभागी नभएको राईले बताए । उनीहरुको अभावमा एलएक्स र शङ्कटाले ठाउँ लिएका हुन् ।
जिल्लाको जेठो तथा आधादर्जन गोल्डकपमध्ये सबभन्दा ठूलो पुरस्कार राशीको बसाहा गोल्डककप विजेता समूहले ट्रफिसहित नगद ५ लाख प्राप्त गर्नेछन् । उपविजेतालाई २ लाख २५ हजार नगदसहित मेडल र प्रमाणपत्र प्रदान गरिने प्रतियोगितामा प्रत्येक दिन म्यान अफ द म्याचलाई ५ हजार र ट्रफि प्रदान गरिनेछ । त्यसैगरी प्रतियोगिताका बेस्ट प्लेयर, बेस्ट मिडफिल्डर, वेस्ट किपर र उदीयमान खेलाडीजस्ता ७ विधागत उपाधि विजेता खेलाडीलाई पनि जनही ५ हजार नगदसहित कप र मेडल प्रदान गरिने अध्यक्ष राईले बताएका छन् ।
सल्लाहकार राईका अनुसार क्लबले प्रतियोगितामा ४० लाख रुपैयाँ खर्च लाग्ने र ६० लाख आमदानी गर्ने लक्ष्य लिएको छ । आफ्नो कोष कमजोर हुनुका साथै स्थायी आयस्रोतको अभावमा हरेक वर्ष प्रतियोगिता गर्न प्रायोजक र सहयोगी गुहार्नुपर्ने समस्याबाट छुटकारा लिन क्बबले प्रतियोगितालाई नाफामा लगेर अक्षयकोष स्थापना गर्ने योजना बनाएको छ ।
आगामी दिनमा प्रतियोगिता गर्न कसैको मुख ताक्नु नपर्ने गरी क्लबलाई स्थायी आर्थिक स्रोतयुक्त बनाउन बसाहा स्थायी घर भई देशविदेशमा रहेका बसाहाबासीदेखि विभिन्न सङ्घसँस्था र कार्यालयहरुसँग सहयोग लिने योजना बनाइएको छ । खेल अवधिको टिकट बिक्री र प्रायोजकको सहयोगलाई पनि आयस्रोतको माध्यम क्लबले बनाएको छ ।
२००७ सालका प्रजातान्त्रिक क्रान्ति योद्धा नारद मुनि थुलुङ राईको स्मृतिमा क्लबले बिगत डेढ दशकदेखि बसाहा क्लबले गोल्डकप प्रतियोगिता आयोजना गर्दै आएको हो । ०४२÷४३ सालताका घना जङगल फाँडेर बसाहा बस्ती बसाएका क्रान्त्रि योद्धा थुलुङलाई बसाहाबासीले एक आदर्श पुरुषका रुपमा मान्दै उनको स्मृतिमा फुटबललगायत विभिन्न गतिबिधि गर्दै आएका छन् ।
ब्साहामा नारद आदर्श शिक्षा क्याम्पस, नारद आदर्श माध्यमिक विद्यालय, रङ्गशाला उनकै नामबाट नामाकरण गरिएका छन् । गोल्डकप पनि हरेक वर्ष उनकै स्मृतिमा आयोजना हँुदै आएको र यो वर्षको खेल दशौँ सँस्करण भएको क्लबले जनाएको छ ।
