२ महिना अघि
२0८१ माघ १४ सोमबार
ताप्ली, माघ १४
जिल्लाको ताप्ली गाउँपालिका ३ इनामेमा रहेको हुलाक कार्यालय रुपाटार सारिएको छ । ३ दशकयता इनामेमा सञ्चालन हुँदै आएको इलाका हुलाक कार्यालय रुपाटारमा गाउँपालिका केन्द्र भएकाले त्यहाँ स्नान्तरण गरिएको हो ।
रुपाटारमा स्थानान्तरण गरेसँगै सोमबारदेखि हुलाक कार्यालयको कामकाज सुचारु भएको छ कार्यालय प्रमुख उमा विकका अनुसार टिकट विक्री वितरण, चिठी पत्र तथा अन्य पार्शललगायत सामानको आदान प्रदान गर्ने कामका लागि हुलाक ताप्लीमा ३ जना कर्मचारी रहेका छन् ।
सरकारले स्थानीयतह पुनर्संरचनापछि हरेक पालिकाको केन्द्रमा हुलाक कार्यालय राख्ने नीति बमोजिम इनामेबाट रुपाटार कार्यालय सारिएको जिल्ला हुलाक कार्यालय प्रमुख ललिता खनालले बताईन् । उनका अनुसार यसअघिका अतिरिक्त तथा इलाका हुलाक कार्यालयको व्यवस्था खारेज गर्दै सरकारले पालिकास्तरमा एउटा हुलाक कार्यालय राख्ने नीति कार्यान्वयन गर्दा इनामेबाट रुपाटार सार्नु परेको हो ।
पछिल्लो नीति कार्यान्वयनका लागि अतिरिक्त र इलाका हुलाकमा कार्यरत कर्मचारी ५८ वर्ष उमेर हद पुगेपछि कर्मचारीसँगै कार्यालय पनि स्वतः खारेज हुने प्रावधान ल्याएको खनालले बताईन् । जस अनुसार उदयपुरमा हाल १७ हुलाकी (पत्र बाहक) तथा १७ जना हलकारा (पत्र वितरक) रहने गरी हुलाक कार्यालयहरु सञ्चालनमा छन् । जिल्लाका ८ स्थानीयतहमध्ये जिल्ला हुलाक सदरमुकाम गाईघाटमा रहेकाले त्रियुगा नगरपालिकाबाहेक ७ स्थानीयतहमा हुलाक कार्यालय रहने गरी अन्य कार्यालय खारेजीको प्रक्रिया चलिरहेको हाकिम खनालले बतईन् ।
हुलाक कार्यालयको औचित्य समाप्त हुँदै गएकाले अनावश्यक आर्थिक भार घटाउन भन्दै सरकारले केहीवर्षयता हुलाकका कर्मचाृरी दरबन्दी घटाउँदै आाएको छ । चालु आर्थिकवर्ष सुरु भएसँगै दर्जन बढी करारका कर्मचारी जागीरबाट हात धुन बाध्य भएका छन् । गत आर्थिकवर्ष पनि ९५ जनाको दरबन्दीबाट ३२ जना हुलाकी दरबन्दी कटौती गर्दै ६३ कायम गरिएको थियो । चालुवर्षको साउनदेखि १७ जना मात्र हुलाकी कायम गर्ने निर्णयले उमेर र जागीरको उत्तराद्र्धमा पुगेका हुलाकीले जागीर छाड्नु परेको थियो ।
गाउँपालिका केन्द्रमा कार्यालय सारेपछि ताप्लीबासीलाई हुलाक सेवा लिन सहज भएको गाउँपालिका अध्यक्ष ढुङ्गराज विकले बताए । उनका अनुसार यसअघि गाउँपालिका केन्द्र भए पनि रुपाटारमा रहेको अतिरिक्त हुलाक खारेज गरेपछि इनामे पुगेर हुलाक सेवा लिन समस्या भईरहेको थियो । गाउँपालिका केन्द्र भएकाले धेरै मान्छेको आउजाउ हुने हुँदा इनामेको कार्यालय यहाँ स्थानान्तरण गरेर सेवा सुचारु गरिएको अध्यक्ष विकले बताए ।
