२ महिना अघि
२0८१ माघ १२ शनिबार
उदयपुर, माघ १२
उदयपुरमा आयोजित 'पूर्व जनमुक्ति सेना मैत्रीपूर्ण फुटबल कप प्रतियोगिता' गाउँपालिका अध्यक्षको गोलले सिन्धुलीले जितेको छ । सदरमुकाम गाईघाटमा शनिबार सम्पन्न फाईनल खेलमा सिन्धुली १-० गोलले जितेको हो ।
गाईघाटस्थित उदयपुर थरुहट रङ्गशालामा भएको खेलमा पूर्व जनमुक्ति सेना सिन्धुली र उदयपुरबीच फाईनलमा प्रतिस्पर्धा भएको थियो । खेलमा सिन्धुलीको मरिण गाउँपालिका अध्यक्षसमेत रहेका पूर्व लडाकु बिमर्श मोक्तान (प्रख्यात)ले गरेको गोलफे जित हासिल भएको हो ।
मध्यान्तरअघिको समय दुवै टिमबाट गोलरहित टुङ्गिएको खेलमा प्रख्यात मध्यान्तरपछि गोल गर्न सफल भएका थिए । उदयपुरका पूर्व लडाकुहरु जीवनी बान्तवा र पार्वती राईको पटकौँको प्रहारले जाली चुम्न नसकेपछि अध्यक्ष प्रख्यातको सोही गोल सिन्धुलीलाई कप जिताउन काफी भईको हो ।
लिग चरणमा खेलाइएको खेलमा दुवै जिल्लाका पूर्व जनमुक्ति सेना, माओबादी पार्टी र योङ कम्युनिष्ट लिग (वाईसिएल) गरि ४ टिमको सहभागिता रहेको आयोजक संयोजक अर्जुन तामाङले बताए ।
महिला पुरुष दुवै पूर्व लडाकु खेलाडीको सराबर सहभागिता रहेको खेल आकर्षक र उत्साहजनक देखिन्थ्यो । मरिणका अध्यक्षको उत्साहपूर्ण खेलले पूर्व जनमुक्ति सेना र दर्शकको हुटिङ पाएको थियो ।
विजेता सिन्धुलीलाई माओबादी केन्द्रीय सदस्य सुरेशकुमार राई (हिमाल), जिल्ला सचिव तथा एन्फा महासचिव किरण राई र प्रदेशसभा सदस्य सम्झना पाख्रिन (योद्धा)ले कप तथा प्रमाणपत्र प्रदान गरे ।
पूर्व जनमुक्ति सेनाहरुलाई पुनरमिलन गराउने तथा खेलकुदको माध्यमबाट स्वस्थ्य र सकृय राख्दै परिवर्तनलाई सँस्थागत गर्ने उदेश्यले यो खेल आयोजना गरिएको जमुसे जेपाल, उदयपुरले जनाएको छ ।
