साकेलाको वडागत शिविरमार्फत भत्ता वितरण

२ महिना अघि

उदयपुर, माघ १०

खोटाङको साकेला गाउँपालिकाले जेष्ठ नागरिक तथा अशक्त र अपाङ्गता भएका लाभग्राहीको सहजताका लागि वडा–वडामा शिविर राखेर सामाजिक सुरक्षा भत्ता वितरण गर्दैछ । विगत वर्षहरुदेखि नै शिविरमार्फत भत्ता वितरण गर्दै आएको गाउँपालिकाले चालु आर्थिक वर्षको दोश्रो त्रैमासिक रकम पनि शिविर आयोजना गर्दै वितरण गरेको हो । 

गाउँ पुर्याएर प्रदान गरेको गाउँपालिकाले पुनः दोश्रो त्रैमासिकमा पनि आईतबारदेखि प्रत्येक वडामा शिविर आयोजना गरेर भत्ता रकम वितरण गर्न सुरु गरेको हो । बैङ्किङ प्रणाली मार्फत त्रैमासिक रुपमा वितरण गर्नुपर्ने भत्ता यसअघिदेखि नै वडा वडा पुगेर वितरण गर्दै आएको गाउँपालिकाले यो प्रथम त्रैमासिकको भत्ता पनि वडामै पुगेर बाँड्न सुरु गरेको हो । गाउँपालिका अध्यक्ष रविप्रकाश राईले भौगोलिक विकटता र शारीरिक अशक्तताका कारण बैंक सम्म आएर भत्ता लिन नागरिकलाई असहज परिस्थिती हुने भएपछि लाभग्राहीलाई झण्झट र दुःख नहोस् भनेर घर पायक पर्ने गरी शिविर राखेर भत्ता वितरण गरिएको बताए । 

वडागत शिविरमा गाउँपालिकास्थित सामाजिक सुरक्षा शाखा, नेपाल एसबिआई बैंक र नेपाल प्रहरीको संयुक्त टोली खटाएर भत्ता वितरण गर्न सुरु गरिएको अध्यक्ष राईले बताए । वृद्ध वृद्धाहरू हिँडडुल गर्न नसक्ने, गाउँपालिका केन्द्रमा रहेको बैंक आउन खर्च र शारीरिक कष्ट हुने तथा अशक्त र अपाङ्गतालाई थप गाह्रो नहोस् भनेर वडामै शिविर राखेर भत्ता बाँडेको अध्यक्ष राई बताए । 

जनप्रतिनिधि भनेको जनताको सेवक र अभिभावकसमेत भएको र अझ ज्येष्ठ नागरिक र शारीरिक रुपमा अशक्तहरूलाई सहज सेवा दिन शिविर सञ्चालन गर्ने गरिएको उनी बताउँछन् । जनतालाई सहज रुपमा सरकारी सेवाको पहुँच पुर्याउन कुनै कसर बाँकी नराख्ने बताउँदै उहाँले हिँडडुल गर्नै नसक्ने कतिपय अशक्तहरूलाई बैंक र गाउँपालिका कर्मचारीलाई घरघर खटाएर समेत बैंङ्किङ सुविधा प्रदान गर्दै आईएको अध्यक्ष राईले बताए । 

शिविरको पहिलो दिन आईतबार वडा नम्बर २ रतन्छास्थित वडा कार्यालयमा आयोजित शिविरमा १ सय ८ जना लाभग्राहीलाई १३ लाख २१ हजार रकम वितरण गरियो । दोस्रो दिन सोमबार १ नं. बाँझेच्यानडाँडास्थित वडा कार्यालयको शिविरमा ७५ जना लाभग्राहीले ८ लाख ८२ हजार भत्ता पाएको नेपाल एसबिआई बैंकका प्रतिनिधि अनिल कुमार महतोले बताए । 

साताव्यापी चल्ने शिविरको तेस्रो दिन म¥गलबार १ नम्बर वडा कार्यालय डाँडागाउँस्थित चण्डेश्वरी आधारभूत विद्यालयमा र बुधबार ३ नम्बरको खिदिमामा तथा बिहीबार ४ नम्बर वडा कार्यालय मात्तिममा र अन्तिम दिन ५ नम्बर मात्तिमबिर्तामा शिविर राखेर भत्ता वितरण गरिएको छ । 

शिविरस्थलमा उपस्थित भएर भत्ता बुझ्न नसक्ने लाभग्राहीहरूको लागि भने नेपाल एसबिआई बैंकको देशभरका जुनसुकै शाखाबाट पनि भत्ता लिन सक्ने व्यवस्था मिलनएको गाउँपालिकाले जनाएको छ । गाउँपालिकाका सामाजिक विकास शाखा संयोजक डिएम चामलिङका अनुसार साकेलाले चालु आर्थिक वर्षको दोस्रो त्रैमासिकमा १ हजार ३ सय ३३ जना लाभग्राहीका लागि गाउँपालिकाले १ करोड ३४ लाख रुपैंया निकासा गरेको छ ।