२ महिना अघि
२0८१ माघ ६ आईतवार
उदयपुर, माघ ६
स्कुल बसको ठक्करले उदयपुरका एक पुरुषको निधन भएको छ । मधेश प्रदेश सिराहाको लाहान बजारमा आइतबार बसको ठक्करबाट घाईते भएका त्रियुगा नगरपालिका ५ देउरीका ४२ वषीृय योगेन्द्र भन्ने किरण थापाको उपचारका क्रममा निधन भएको हो ।
सिरहाको मिर्चैयाबाट बा १८ प ८३२५ नम्बरको मोटरसाइकलमा श्रीमति र छोरासहित मोटरसाईकलमा उदयपुर घरतर्फ आउँदै गरेका थापालाई लहान नगरपालिका १२ स्थित बाटिका होटेलअगाडि विद्याश्रम स्कुलको प्र २ –००–००१ नम्बरको बसले ठक्कर दिदा गम्भीर घाईते भएका थिए । थापा मिर्चैयास्थित स्वस्तिका बोर्डिङमा कर्मचारी हुन् । उनी परिवारसहित घर आईरहेका बेला दुर्घटना भएको प्रहरीले जनाएको छ ।
दुर्घटनामा परी गम्भीर घाईते थापालाई तत्काल हेलिकोप्टरमार्फत काठमाडौँ लगिएकोमा उपचारकै क्रममा निधन भएको पारिवारिक स्रोतले जनाएको छ । दुर्घटनामा परी थापाकी पत्नी सुधा घिमिरे र छोरी शैलजा पनि घाईते भएका छन् । छोरी शैलजाको अबस्था गम्भीर रहेकोले काठमाडौँस्थित मेडिसिटी अस्पतालको भेन्टिलेटरमा राखिएको छ भने सुधाको अवस्था भने सामान्य रहेको परिवारले जनाएको छ ।
दुर्घटना गराउने बस र चालक दिपेशकुमार चौधरीलाई इलाका प्रहरी कार्यालय लाहानले नियन्त्रणमा लिएर अनुसन्धान सुरु गरेको जनाइएको छ ।
