२ महिना अघि
२0८१ माघ ३ बिहीबार
उदयपुर, माघ ३
उदयपुरको बिकट पहाडी लिमचुङबुङ गाउँपालिकाले साझा सूचना केन्द्र स्थापना गर्ने भएको छ । गाउँपालिकाको माघ २ गते सम्पन्न दशौँ कार्यपालिका बैठकले सबै स्थानीयतहहरुको सहजताका लागि वडा नं. ३ को निर्माणाधीध एभरेष्ट भ्युटावरस्थलमा ‘बृहत एकीकृत पर्यटकीय सूचना केन्द्र’ स्थापना गर्ने निर्णय गरेको हो ।
देशभरका ७ सय ५३ वटै स्थानीयतहको साझा पर्यटन विकास र समृद्धि हासिल गर्ने लक्ष्यका साथ यो सूचना केन्द्र खोल्न लागेको गाउँपालिका अध्यक्ष मेजरकुमार राईले बताएका छन् । उनका अनुसार सूचना केन्द्र स्थापनाका लागि सबै स्थानीयतहहरुलाई पत्राचार गर्ने तयारीसमेत भईरहेको छ ।
गाउँपालिकाले विहीबार एक सूचना जारी गर्दै सूचना पार्टी स्थापनाबारे जानकारी गराएको छ । प्रमुख प्रशासकीय अधिकृत ताराकिरण राईद्वारा हस्ताक्षरित सूचना अनुसार कुनै पनि स्थानीयतहले आफ्नो गाउँ तथा नगरपालिकाभित्र हुने उत्पादन, व्यापार, कला, सँस्कृति र पर्यटकीय गन्तव्यहरुको जानकारी डिजिटल सूचना केन्द्रमार्फत गराउन सक्नेछन् ।
डिजिटल सूचना केन्द्रमार्फत देश विदेशबाट भ्युटावर भ्रमण गर्न आउने पर्यटकले सबै स्थानीयतहहरुको जानकारी त्यहीँबाट लिन सक्ने अपेक्षा गाउँपालिकाले गरेको छ ।
डिजिटल सूचना पार्टी स्थापनाका लागि कुनै शूल्क नलाग्ने तर, लगानी भने स्वयंले गर्नुपर्नेछ । त्यसका लागि बुकिङ खुल्ला गरिसकिएको जानकारी दिदै आवश्यक जानकारीका लागि अध्यक्ष राई र गाउँपालिका कार्यालयमा सम्पर्क गर्न सूचित गरिएको छ ।
