२ महिना अघि
२0८१ पुष २९ सोमबार
उदयपुर, पुस २९
त्रियुगा नगरपालिकाले नगरस्तरीय प्रज्ञा प्रतिष्ठान खोल्न आवश्यक कानुन पारित गरेको छ । सोमबार आयोजित ‘१४ औँ नगरसभा’ले ‘त्रियसुगा नगरपालिका प्रज्ञा प्रतिष्ठान बिधेयक ०८१’ सर्वसम्मत पारित गरेसँगै नगरपालिकालाई यो बाटो खुलेको हो ।
नगरसभाले अन्य आवश्यक नीति नियम र कानुनहरु प्नि पारित गरेको छ । गत १३ औँ नगरसभाले प्रक्षेपण गरेको नीति कार्यक्रम र बजेट पनि यो सभाले संशोधन गरेको छ । संशोधन अन्तर्गत झण्डै २ दर्जन बजेट शीर्षक संशोधन गरेर ७५ वटामा विस्तार गरिएको छ । सानातिना योजनामा विनियोजित शीर्षकको बजेटलाई ६ दर्जन बढी सङ्ख्यामा विभक्त गर्दै संशोधन गरिएको हो ।
त्रियुगाले विश्व बैङको ६५ करोड बढी ऋण सहयोगमा निर्माणाधीन गाईघाट बजार सडक स्तरोन्नतिसहित कालोपत्रेसहित १ अर्ब ९२ करोड ८१ लख ५७ हजार आकारको बजेट चालु वर्ष परिचालन गरिरहेको छ । सो प्रक्षेपित बजेटको आकारलाई भने नगरसभाले यथावत राखेको प्रमुख प्रशासकीय अधिकृत विष्णुभक्त सिग्देलले बताए । उनका अनुसार कुल प्रक्षेपित बजेटको आकार नचलाइ अन्य केही शीर्षकगत बजेट मात्र आवश्यक्ता अनुसार संशोधन गरिएको हो ।
१३ औं नगरसभाबाट पारित बजेट तथा नीति कार्यक्रममा खासै फेरबदल नगरिएको तर, बजेट शीर्षकहरुलाई भने संशोधन गरेर योजना सङ्ख्या बढाइएको हाकिम सिग्देलले बताएका छन् ।
नगरसभामा सदस्यहरु भीमचन्द्र राई, इन्द्रबहादुर कार्की, तुलबहादुर मगर, सूर्य राई, प्रवेश खड्का, अर्जुन पोखरेललगायत ७ जनाले टिप्पणी गर्दै सुझाव दिएका थिए । सभासद राईले नगरक्षेत्रमा निर्माणाधीन विश्व बैङ्कको ऋण लगानीको सडक अनुगमन गर्ने क्रममा उपप्रमुख महेश्वरी राईले बिबाद झिकेपछि काम रोकिएको गुनासो आएकोमा प्रष्ट्याउन माग गरे ।
अर्का सदस्य प्रवेश खड्काले नगर अस्पताल देउरीमा खोल्नुले दक्षिणी भेगका नगरबासीलाई सुविधा पुगेकोमा खुसी व्यक्त गर्दै मेयर कप रनिङ सिल्ड गाईघाटभन्दा बाहिर आयोजना गरेर विकेन्द्रिरणको सिद्धान्त लागू गरेकोमा प्रशंसा गरे । खड्काले प्रस्तावित औद्योगिक ग्राम छिटो निर्माण गर्न पनि आग्रह गरे भने उपभोक्ता समितिमार्फत काम गर्दा ५ प्रतिशत धरौटी र सडक विद्युत शूल्कवापत प्रति घरधुरी २ सय रुपैँया लिने नगरपालिकाको नियमले नगरबासी पीडित हुन पुगेको बताए ।
अर्का सभासद अर्जुन पोखरेलले किसानको नाममा नगरपालिकाले वितरण गर्दै आएको यन्त्र उपकरण र विउ विजनजस्ता सहयोग उपलब्धीविहीन भएको भन्दै त्यसलाई सच्याएर कृषिमैत्री कार्यक्रम लागू गर्न सुझाए । उनले नगरपालिकाले गैरसरकारी सँस्थाको खुट्टामा हिड्नुभन्दा आफ्नै बलबुतामा देखिने काम गर्न पनि सुझाए ।
सभासद तुलबहादुर मगरले भूमिहीन र सुकुम्बासीलाई जग्गा दिने भनेर नगरपालिकाले यन्त्र उपकरण खरिद गर्नुका साथै कर्मचारी राखेकोमा केही काम नभईरहेको भन्दै तत्काल जमिन व्यवस्थापनमा लाग्न ध्यानाकर्षण गराए । सदस्य इन्द्र कार्कीले उपनिर्वाचनबाट निर्वाचित १२ नं. वडाध्यक्षलाई बधाई दिदै यस्तो प्रस्ता सिंगो नगरसभाले नै ल्याएर बधाई प्रस्ताव पारित गरको भए उत्तम हुने भनाई राखे ।
सभासदहरुको सुझाव र टिप्पणीपछि मेयर बस्नेतले जवाफ फर्काएको थिए । त्यसपछि मेयर बस्नेतले एकपछि अर्को प्रस्तुत प्रस्तावहरुको सभासदरहरुले कर्तल ध्वनीका साथ पारित गरेका थिए । प्रस्तावहरु पारित भएसँगै उपमेयर राईले सहभागी सभासदहरुप्रति धन्यबाद व्यक्त गरेपछि नगरसभा सकिएको घोषणा गरिएको थियो ।
