२ महिना अघि
२0८१ पुष २७ शनिबार
उदयपुर, पुस २७
गएको असोज १२ गतेको बाढीले पक्की पुल भत्काएपछि अवरुद्ध भएको गाईघाट–दिक्तेल जोड्ने सगरमाथा लोकमार्ग आजदेखि सुचारु हुँदैछ । लोकमार्गको मुख्य नाका फोक्सिन्टारस्थित सुन नदीमा बेलिब्रीज बनेसँर्गै शनिबारदेखि सोझो यातायात चल्न थालेको हो ।
पुस पहिलो सातादेखि निर्माण सुरु भएको ५० मिटर लामो बेलिब्रीज निर्माण कार्य ३ साताभित्रै सम्पन्न भएर शनिबारदेखि यातायात चल्न थालेको गाईघाट दिक्तेल सडक योजना कार्यालय गाईघाटका योजना प्रमुख (डिई) पशुपति ज्ञवालीले बताए ।
मङ्सिर अन्तिममा मूल्य अभिबृद्धि कर (भ्याट)सहित १ करोड २९ लाख ४६ हजार ७७ रुपैँयामा बेलिब्रीज निर्माणको ठेक्का लागेको थियो । आरएन कन्स्ट्रक्सन कटारीले सम्झौता मितिभित्रै बेलिब्रीज निर्माण सम्पन्न गरेको डिई ज्ञवालीले बताएका छन् ।
बेलिब्रीज सञ्चालनमा आएपछि आउँदो वर्षा लाग्नुअघिसम्म यातायात आउजाउ समस्या टरेको हिमाली यातायात व्यवसायी केन्द्र प्रालि गाईघाटका महासचिव उमेश बस्नेतले बताए । उनका अनुसार आउँदो वर्षासम्म बेलिब्रीज चल्ने भएकाले ३–४ महिनासम्मका लागि खोटाङ–उदयपुर गाडी आउजाउ सहज हुनेछ ।
वर्षा सुरु भएपछि भने बेलिब्रीज हटाउनु पर्ने हुँदा स्थायी समाधान भने यो होईन । व्यवसायीहले वर्षायाम सुरु भएपछि बेलिब्रीज नदीमा पानीको सतह बढ्ने भएकाले हटाउनुपर्ने हुन्छ । वैशाख पहिलो–दोस्रो सातादेखि वर्षा सुरु हुने र पानीको सतह बढेपछि बेलिब्रीज नै बगाउने खतरा हुने हुँदा खोलेर राख्नुपर्ने हुन्छ ।
पुल भत्केसँगै गाईघाट–दिक्तेल सोझो यातायात सम्बन्ध विच्छेद हुँदा खोटाङबासीलाई गाईघाट, धरान, विराटनगर, सप्तरी, सिराहाजस्ता तराई भेग र राजधानी काठमाडौँ आउजाउमा चरम समस्या परेको थियो ।
रौतामाई गाउँपालिका ५ र खोटाङतर्फ खोटेहाङ ९ लिच्कीराम्चेबीच फोक्सिन्टारमा दशक लगाएर निर्माण भएको १ सय २० मिटर लामो आर्क डिजाईनको पक्की पुल बाढीले भत्काएको थियो । फोक्सिन्टारको पक्की पुल ०७९ मध्यदेखि सञ्चालनमा आएको थियो । सुरु भएको झण्डै दशकपछि पुल सञ्चालनमा आए पनि वारिपारिको पहुँच मार्ग (एप्रोच सडक)समेत बन्न बाँकी छँदै २ वर्ष नपुगी बाढीले बगाएको हो ।
