सामूदायिक वन समूहद्वारा न्यानो कपडा र विद्युत जोड्ने मिटरबक्स

२ महिना अघि

कटारी, पुस २५

कटारीको सरस्वति सामुदायिक वन उपभोक्ता समूहले बालबालिकालाई न्यानो कपडा र उपभोक्तालाई निःशूल्क विद्युत लाईन जडान गरिदिएको छ । कटारी नगरपालिका ७ स्थित सरस्वति आधारभूत विद्यालयका बालबालिकालाई न्यानो कपडा वितरण गरेको हो । जाडो याममा चिसोबाट बँचाउने उदेश्यले समूहले आधारभूत तहमा अध्ययनरत ५० जना बालबालिकालाई न्यानो कपडा वितरण गरेको हो । समूहले उनीहरुलाई एकजोर ट्र्याकसुट, जुत्ता, मोजा र किताव बोक्ने स्कुल व्यागसमेत सहयोग गरेको छ । 

समूहका अध्यक्ष खड्गबहादुर तामाङले बालबालिकालाई बढ्दो चिसोबाट बचाउँदै नियमित विद्यालय आउने बनाउन सो सहयोग गरेको बताए । उनका अनुसार समूहले उपभोक्ता हितमैत्री गतिबिधि गर्ने गरी पारित गरेको वार्षिक कार्ययोजना अनुसार सो कार्यक्रम गरिएको हो । अध्यक्ष तामाङले समूहले हरेक वर्ष उपभोक्ता हितकेन्द्रित गतिबिधि गर्नुपर्ने कार्ययोजनामा उल्लेख भए अनुसार बालबालिकालाई न्यानो कपडा सहयोग गरिएको बताए ।

अध्यक्ष तामाङले समूहले वडाभित्रका उपभोक्तालाई निःशूल्क विजुली बत्ती पनि जडान गरिदिएको बताए । वडाभित्रका ७० घरधुरी निम्न र विपन्न परिवार उपभोक्ताको घरमा विद्युत जडान गरिएको छ । अध्यक्ष तामाङले उपभोक्ताकै सहयोग र सुरक्षाबाट वन जङ्गलको विकास र रक्षा हुने भएकाले समूहले पनि उपभोक्तामैत्री गतिबिधि गर्नुपर्ने बताए । 

‘सामुदायिक वन भनेको स्थानीय समुदायकै हो, उनीहरुकै रेखदेख र सुरक्षाबाट वन जङ्गल बँच्ने, विकास हुने हो’ अध्यक्ष तामाङले भने ‘त्यसैले हरेक वर्ष समूहले पनि उपभोक्ताकै हितमा केन्द्रित भएर गतिबिधिहरु गर्ने गरेको छ । त्यही अनुरुप यस्ता कार्यक्रम गर्दै आएका छौँ ।’ यी गतिबिधि गर्दा वन पैदावारको विक्री वितरणबाट आएको आमदानीको उपयोग गर्ने गरिएको समूहको भनाई छ । 

समूहका सचिव कर्णबहादुर तामाङका अनुसार बलबालिकालाई न्यानो कपडासहित वितरण  सामाग्री खरिदमा १ लाख ४ हजार खर्च भएको छ । त्यस्तै ७० घरधुरी उपभोक्ताको विजुली जडानमा १० लाख खर्च भएको छ । सो बजेटबाट उपभोक्तालाई निःशूल्क मिटरवक्स र कालो तार उपलब्ध गराएर विद्यूत जडान गर्न सहयोग पु¥याएको सचिव तामाङले बताए । 

वर्षौँअघि गाउँमा विजुलीको पोल र तार विस्तार भईसके पनि आर्थिकस्तर कमजोरीका कारण मिटरबक्स र कालो तार किन्नसमेत नसकेका कारण अँध्यारोमा बस्न बाध्य उपभोक्तालाई समूहले लगानी गरेर उज्यालो बालिदिएको हो । त्यसका लागि समूहले विद्युत जडानका लागि दशलाख नेपाल विद्युत प्राधिकरण प्रशाखा कटारीसँग समन्वय गरेको जनाएको छ । 

वन समूहले हरेक वर्षको वार्षिक कार्ययोजनामा उपभोक्तामैत्री गतिबिधि गर्ने कार्यक्रम राखेर कार्यान्वयन  गर्दै आएको छ । जस अनुसार शिक्षा, स्वास्थ्य, खानेपानी, विद्युत र सडकजस्ता भौतिक पूर्वाधारका कुरामा पनि लगानी गर्दै आएको छ । 

बुधबार आयोजित एक कार्यक्रममा बालबालिकालाई न्यानो कपडा वितरण गर्दै अध्यक्ष तामाङले वन समूहले वर्षेनी यस्ता कार्यक्रम गर्दै आएको बताए । उनले आगामी दिनमा पनि उपभोक्ता हितकेन्द्रित कार्यक्रमलाई निरन्तरता दिदै लाने प्रतिबद्धता पनि जनाए ।